-6 °С
Болытлы
Гәзиткә язылуVKOKTelegramЯRus
Барлык яңалыклар
Җәмгыять
31 октябрь 2015, 12:17

Иминлек — үсеш өчен мөһим шарт

Киләчәктә дәүләт карамагында булмаган хәвефсезлек оешмалары урамнарда тәртип саклауга да җәлеп ителәчәк.Соңгы вакытта террорчылык дөньядагы имин тормышка яный. Гарәп илләрендәге хәл-вакыйгалар, Көнбатыш Европага качаклар агылуы күп кенә илләрне берләшергә, явызлыкка каршы уртак көч белән көрәшергә этәрде. Әлбәттә, урыннарда, ил төбәкләрендә дә иминлек мәсьәләсенә җитди игътибар бүлү мөһим. Уфаның “Шератон” кунакханәсендә дәвам итүче “Хәзерге заманда дәүләт карамагында булмаган хәвефсезлек оешмалары торышы һәм киләчәге” дигән II Халыкара конференциядә шул хакта да сүз барды. Чарада Русия төбәкләреннән, Казахстан Республикасыннан хәвефсезлек оешмалары вәкилләре, җитәкчеләр катнаша.

Конференция башланыр алдыннан анда катнашучыларга Башкортстан Башлыгы Рөстәм Хәмитовның сәламләве укып ишеттерелде.

— Мондый дәрәҗәле чара­ның Уфада үтүе очраклы түгел, — диде якташыбыз, Дәүләт думасының Халыкара эшләр буенча комитеты депутаты Әнвәр Мәхмүтов. — Уфа Русия, халыкара дәрәҗәдәге чаралар үткәрү урынына әверелде. Гомумән, һәр чара хәвефсезлек белән тыгыз бәйле. Чөнки хәвефсезлек дәрәҗәсе түбән булган төбәктә бизнес та үсешмәячәк, эшлекле активлык та сүлпән булачак. Шуңа күрә хәвефсезлек — бизнес, һәр­төрле юнәлешләрдәге хезмәт­тәшлек үсешсен өчен бик мөһим шарт. Конференциядә бизнес өлкә­сендәге хәвефсе­з­леккә аерым урын бирелә. Чарага үз эшенең осталары җыелды. Катнашу­чылар, тәҗ­рибә уртаклашып, кайбер мәсьәлә­ләрне хәл итү буенча фикер алышачак. Законнар чыгару, бизнес белән дәүләт арасындагы хезмәттәшлек буенча белгечләр дә чакырылды. Шуңа күрә конференция нәтиҗәле булачак.

Чыгыш ясаучылар моңа кадәр дә дәүләт карамагында булмаган хәвефсезлек оешма­ларының хокук саклауда әһәмияте зур булуын сызык өстенә алды. Сочи Олимпиадасы, Казан универсиадасы да алар ярдәменнән башка уз­маган. Бүген дә күп кенә спорт, төзелеш, социаль объ­ектлар шәхси сак предприятиеләре “калканы” астында. Террор­чылык колач җәяргә омтылган чорда җинаятьчелеккә каршы көрәшкә хәвефсезлек оешма­ларын да җәлеп итү мөһим. Беренче чиратта, патруль-пост хезмәтенә шәһәр урамнарында тәртип урнаштыруда ярдәм кулы сузу турында сүз бара. Сыйфат мәсьәләсенә дә игътибар артачак. Атап әйткәндә, мондый оешмаларга хезмәт­кәрләрне сайлап кына алачаклар.

Кунаклар фойеда оешты­рылган күргәзмәләр белән дә таныша алды.

Статистика мәгълүматлары күрсәтүенчә, бүген Русиядә 23,5 мең сак оешмасы исәпләнә. Аларда 720 мең шәхси сакчы хезмәт сала. Сакланучы объектлар саны — 750 мең. Күренүенчә, дәүләт карамагында булмаган хәвефсезлек оешмалары имин тормыш сагында уяу тора. Дөньядагы хәл-шартлар алар алдында яңа бурычлар куя. Сак оеш­ма­ла­рының халык иминлеген тәэмин итүгә дә зур өлеш кертәчәгенә өмет зур.
Читайте нас в