Картлыктан яшьлеккә илтүче юлда

Сәнгать җитәкчесе Таңсы­лу Байегетова биредә җыр-моңга, гүзәллеккә гашыйк авыл­дашларны җыйган. Унөч кешедән торган “Хәзинә” фольк­лор ансамбле — клуб­ның гына түгел, район мәдә­ниятенең дә йөзек кашы. Алар­ның чыгышлары республика күләмендә узган чараларны да бизи. Коллективка, башлыча, өлкән яшьтәгеләр тупланган. Зәлифә апа Гаделшина 40 ел башлангыч сыйныфлар укытучысы булып эшләп хаклы ялга чыккан. 71 яшьлек хезмәт ветераны һәм аның ахирәт­ләре актив, сәла­мәт тормыш белән яши.

— Клубка атнасына ике тап­кыр җыелабыз, – дип сөйли ул. — Башта кул эшләре түгәрә­гендә шөгыльләнәбез. Анда бер-беребез белән тегү, чигү, бәйләү, мәрҗән белән эшләү серләрен уртаклашабыз. Аннан соң безне клуб белән бер бинада урнашкан мәктәп спорт залында фитнес түгәрәгендә көтәләр. Сөякләр­не язып алгач, барыбыз да яраткан “Тәмле” түгәрәгенә җыелабыз. Анда аш-су серлә­рен уртаклашып, берәр яңа ризык әзерләргә өйрә­нәбез, чәйләп тә алабыз.

Аның сүзләрен 76 яшьлек хезмәт ветераны Резеда апа Сәйфетдинова да куәтли.

— Картлык эзләп килгәндә без өйдә булмыйбыз — шө­гыль­ләребез муеннан, шуңа да яшьлектән аерылырга җыен­мыйбыз, — ди ул.

Авылдагы һәр мәдәни чара, мәктәптәге бәйрәмнәр “Хәзинә” коллективыннан башка узмый. Бөек Җиңүнең 70 еллыгына алар Гәрәй Ихса­нов­ның “Җиделе шәм” әсәрен сәхнәләштергән. Тамашачыларны әкиятләр белән дә ки­нәндерәләр. Күптән түгел авыл халкына “Шалкан”, “Алтын балык” әкиятләрен күрсәт­кәннәр. Ел саен район буенча оештырылган Кыш бабайлар бәйге­сендә аларны уздыручы сирәк. Мәктәптәге “Соңгы кыңгы­рау” бәйрәмендә ак алъяпкычлы үсмер кызлар кыяфәтенә кереп тә җыелу­чыларны таң калдырган алар. Бу апа­ларның уйлап табу сәләтенә исең китәрлек!

— Җитәкчебез Таңсылу­дан уңдык, — ди алар бертавыштан.

Чыннан да, Таңсылу Байе­ге­­тованың оештыру сәләте сокландыра. Ул килеп туган мәсьәләләрне яхшылык белән хәл итәргә күнеккән. Сәнгать коллективы туплангач, сәхнә костюмнарын үз акчаларына сатып алырга карар итәләр. Әмма бу гына җитми. Алар район хакимияте башлыгы Фәнзил Чыңгызовның халык белән очрашуына бара. Билгеле инде, мондый чарада төрле мәсьәләләр күтәрелә, аларның кайберләре кызу бәхәс тудыра. Шунда “Хәзинә” ансамбле сүз сорый. Рөхсәт алгач, алар башта тезелеп басып җырлап җибәрә. Халык беразга аптырап кала. Шуннан гына коллективның хакимият башлыгыннан сәхнә костюмнары алырга ярдәм сорап килгәне ачыклана. Аның ярдәме белән тиз арада 150 мең сумлык костюмнар текте­рәләр. Бүген аларга сокланмаган кеше юк.

Картлыктан яшьлеккә юл юк, дисәләр дә, Иске Кыешкы авылының ак инәйләре юлны тапкан — алар һәрвакыт хәрә­кәт­тә.