Элекке очучылар булмый ул!

Шамил Исламов Әфган сугышында бихисап тапкыр үлем белән күзгә-күз очрашкан, яуларда күрсәткән батырлыгы өчен ике Кызыл Йолдыз ордены белән бүләкләнгән. Ул, Дүртөйле шәһәренең 2нче мәктәбен тәмамлагач, В. П. Чкалов исемендәге очучылар әзер­ләүче хәрби авиация училищесына укырга керә, аннары 274нче истребитель-бомбардировщиклар полкында хезмәт итә. “Беренче класслы хәрби очучы” дигән исемгә лаек була.
-
1987 елда Шамил Лотф­рах­ман улы Әфганстанга җибә­релә. Дәһшәтле әфган күгендә ул 300гә якын хәрби очыш ясый. Үзенә йөк­ләтелгән хәрби бурычларны да җиренә җиткереп үти, адәм баласы күтәрә алмаслык авыр минутларда да рух ныклыгын саклап калуы белән күпләргә үрнәк була.

— Әфганстан күңелемдә ачы әрнүләр калдырган һәм... бәхет бүләк иткән җир. Анда мин үземнең гомерлек сөюемне — булачак хатыным Валяны очраттым, — ди ул. — Валентина безнең хәрби ашханәдә эшли иде.

Әфган сугышы тәмам­лангач, Шамил Исламов Гер­ма­ния­дә хезмәт итә. Хәрби карь­ерасын тәмамлагач, Валенти­насы белән туган Дүрт­өйле шәһәренә кайта. “Чакмагышнефть” нефть һәм газ чыгару идарәсендә гади слесарь булып эш башлый. Техниканы биш бармагы кебек белүче, булдыклы Исламовны тора-бара мастер итеп үрләтәләр. Ә 2012 елда героебыз тормышында тагын бер кискен борылыш була: аны Дүртөйле шәһәре мэры итеп тәга­енлиләр.

— Эшемне яратам. Якташларыма, туган шәһәремә хезмәт итә алуым белән бәхетлемен, — ди Шамил Лотфрахман улы. — Ә иксез-чиксез күк мине хыялымда һаман үзенә чакыра. Очучылар элекке булмыйдыр ул...