Ватанпәрвәрлек тарихтан башлана

Ватанны саклаучылар көне алдыннан Хәрби-диңгез флоты һәм Башкортстаннан чыккан хәрби диңгезчеләр музее ачылу — моның чираттагы чагылышы. Мәскәү дәүләт су транспорты академиясенең Уфадагы филиалы актлар залында Башкортстанның Диң­гез­челәр җыелышы вәкил­ләре, ветераннар, район хакимияте вәкилләре, училище курсантлары, преподаватель­ләр катнашлыгында патриотик-тәр­бияви чара узды.

— Тын океан, Балтыйк, Каспий, Кара, Төньяк диң­гезләрдә йөзүчеләрдән кайнар сәлам тапшырам, — диде Тын океан флотының су асты көймәләре көчләре командующие, вице-адмирал Игорь Мө­хәммәтшин. — Арагызда флот ветераннарын, хәрби хәрә­кәт­ләрдә катнашканнарны кү­рүемә шатмын. Яшьләр сездән үрнәк алсын, тарих белән ныклап кызыксынсын иде, чөнки патриотизм тарих белән тыгыз бәйле. Илебез, республиканың данлыклы адмираллары, геройларына тиңләшеп, яшьләр якты эзле тарихыбызны белеп үсәргә тиеш.

Бөек Ватан сугышында су өстендәге сугышларда 1,5 миллионнан артык диңгезче катнашкан. Бүген училищеның педагогик коллективы тырышлыгы белән Башкортстаннан чыккан 34 адмиралның биографиясе булдырылган. Шулар арасында контр-адмирал Юрий Рай, Балтыйк флотының штаб начальнигы, контр-адмирал Михаил Бакаев һәм башка исемнәр бар. Башкортстаннан 6 диңгезче Советлар Союзы Герое исеменә лаек булган. Яңа ачылган музейда тарих, Хәрби-диңгез флоты буенча, якташларыбыз турында бай мәгълүмат тупланган. Музей эшчәнлеге белән аның җитәкчесе Ринат Икъсанов таныштырды.

—Училищеда, яшьләре­безне төпле һөнәргә өйрәтүдән тыш, шәхес буларак тәрбия­ләүгә зур игътибар бирелә. Хәрби техникадан тыш, Ва­таныбызның тагын бер коралы — героик үткәнебез һәм патриотик тәрбия. Ватанпәр­вәр­лек тәрбияләү тарихтан башланырга тиеш, — диде су транспорты академиясенең Уфа филиалы директоры Николай Бричкин.

Музей ачылу тантанасы курсантлар көче белән әзер­ләнгән концерт белән үрелеп барды. Ике алдынгы укучы “Яшь Ватан сакчысы” ордены белән бүләкләнде.