Линария

Мин якташыбызның гаилә әгъзаларын эзли башладым. Линария Батырованың — Бөгелмәдә, Эмма Мөхәммәт­җанованың Уфада яшәве билгеле булды. Интернетны начар әйбер, кеше көне буе андагы челтәрләрдә утырып, сәламәтлеген бетерә, дип зарланабыз. Бу очракта моның белән бик килешеп бетмим. Чөнки нәкъ Интернет челтәре аша Линария Батырованы таптым һәм аңа хат җибәрдем. Әлбәттә, өлкән яшьтәге ханымның заман техникасы белән таныш булуына, Интернет челтәрләрендә утыруына шигем бар иде. Ләкин юкка гына шиклән­гәнмен икән, ике сәгатьтән җавап килде:

“...Әйе, мин — Бәдрүш Мокамайның кызы. Урысча язуым өчен гафу итегез. Бала чагым урыс авылында үтте, урыс мәктәбендә укыдым. Мин татарча сөйләшәм, укыйм, ләкин яза белмим. Әле мин Бөгелмә шәһәрендә яшим, миңа 77 яшь, еш авырыйм.

28 февраль, 2016 ел”.

Менә шулай без Линария Бәдретдин кызы белән хат алыша башладык. Хатларның берсендә ул балаларының Мәскәүдә яшәве, тиздән үзенең дә анда күченеп китәчәге турында хәбәр итте. Берничә көннән без фотохәбәрче Наил Акмеев белән Бәдрүш Мокамайның кызы яшәгән Бөгелмәгә юлландык.

Линария Бәдретдин кызы безне якын туганнары кебек каршы алды. Батыров­ларның иркен фатирына аяк басу белән борынга тәмле аш исе килеп бәрелде. “Ерак юлдан килгәнсез, башта тамак ялгап алыйк, аннары иркенләп сөйлә­шербез”, — дип, хуҗабикә безне мул сыйлы табынга чакырды. Фатирның һәр бүлмәсендә фотосурәтләр: Бәдрүш Мокамай, Линария апа яшь чагында, Батыровлар гаиләсе, балалары, онык­лары...

– Әлбәттә, фатир диварына фотосурәтләр элүне хупламыйлар, бу хакта миңа кешеләр дә әйтте. Ә мин элдем, чөнки, аларга карап, күңелемә юаныч табам, — ди ул, әтисенең фотосурәтләре беркетелгән зур альбомны кулына алып.