+9 °С
Ачык
Гәзиткә язылуVKOKTelegram
Барлык яңалыклар
Җәмгыять
17 Май 2016, 02:00

Чит илнеке – затлы, үзебезнеке – ышанычлы

Уфада дөнья базарын яулардай югары технологияләр җитештерелә.Моңа 16-17 майда Уфада үтүче “ПРОФ-IT.2016” Бөтенрусия форумында инанырга мөмкин иде. Чараны ачу тантанасы һәм пленар өлеш “Конгресс-холл”да оештырылды. Аның кысасында конкурста катнашучылар үзләренең проектларын яклый. Шунда ук югары технологияләр күргәзмәсе дә оештырылды. Экспонатлар Русия Президенты ярдәмчесе Игорь Щеголев белән Башкортстан Башлыгы Рөстәм Хәмитовта да зур кызыксыну уятты.

– Без телекоммуникация техникасы җитештерәбез, – диде дәрәҗәле кунакларны стенд янында каршы алган “Полигон” предприятиесенең маркетинг һәм сату идарәсе җитәкчесе Азамат Якубов. – Башлыча, элемтә оператор­лары, дәүләт власте органнары, ведомстволар һәм башкалар белән хезмәттәшлек итәбез. Бүген Русия базарында телекоммуникация техникасын уйлап табу һәм җитештерү өлкәсендә алдынгы урыннардабыз. Без эшләгән коммутаторлар, маршрутизаторлар бик күп предприятиеләрдә файдаланыла. Программа тәэми­натын да үзебезнең белгечләр яза. Иң мөһиме – техника ышанычлы булырга тиеш. Базарда АКШ һәм Азия җитеш­терүчеләре белән уңышлы көндәшлек итәбез. “Полигон”да җыелган техника, чит илнекеләрдән арзанрак булудан тыш, сыйфат ягыннан да калышмый.

Форумны ачу тантана­сыннан соң пленар өлеш башланды. “Чит ил программа тәэминатын үзебезнекенә алыштыру”, “Илдәге программа тәэминаты реестрын оештыру”, “Русиянең телекоммуникация техникасын җитеш­терүчеләрнең мөмкин­лекләре” һәм көн кадагына сугучы башка темаларга чыгышлар яңгырады. Форумның беренче көне фикер алышу, тәҗрибә уртаклашу белән тәмамланды.

Бүген “ПРОФ-IT.2016” конкурсы җиңүчеләре ачык­ланачак. Әйткәндәй, быел бәйгегә ил төбәкләреннән 130 проект тәкъдим ителгән, шуларның 30ы финалга үткән. Җиңүгә Башкортстаннан да өч проект дәгъва итә. Чара “Дәүләт IТ-менеджеры мәктәбе” се­минары белән тәмамланачак.
Читайте нас: