+19 °С
Болытлы
Гәзиткә язылуVKOKTelegram
Барлык яңалыклар
Җәмгыять
11 июнь 2016, 02:00

Быел да сынатмаслар!

БДАУның “Колос” отряды 1100дән артык студентны берләштерәчәк.Шушы уңайдан Яшьләр сарае каршында тантаналы чара үтте. Анда БДАУ ректоры Илдар Габитов, республика авыл хуҗалыгы министры урынбасары Азат Җиһаншин, студентлар отрядлары һәм баш­ка­лар катнашты. Әйткәндәй, былтыр “Колос” отряды вәкилләре тарафыннан 17 мең гектардан артык бөртеклеләр чабып, 160 тоннадан артык ашлык суктырып алынган. Отряд алтынчы ел рәттән Башкортстанда иң алдынгы урында. Аграрийларның быелгы җәе дә нәтиҗәле үтмәкче.

– Хезмәт семестрына әзерлек эшләре ел дәвамында алып барылды, – ди “Колос” отряды командиры Азат Шәрәфетдинов. – Җитмештән артык студент республика программасы кысаларында һөнәрләр үзләш­терде. Эш тәкъдим итүчеләр белән сөйләшүләр, килешүләр нәтиҗәле булды. Башкортстанның, илнең төрле төбәкләрендә 1100дән артык студент хезмәт чыныгуы алачак. Мисал өчен, кырык студент июнь-август айларында Кырымда “Инкерман” заводында эшләячәк. Безнең студентлар Краснодар краенда, Татарстан Республи­касында һәм башка төбәкләрдә хез­мәт салачак. Йөздән артык студент республикада көзге уракта катнашачак. Хезмәт семестры нәтиҗәләре буенча алдынгылар премияләр белән дәрт­ләндереләчәк, шуңа беркем дә сынатмас дип уйлыйм. Быел да алдыбызга куйган максатларга ирешер­гә, җәм­гыятькә файда китерергә, яшьләрне эшкә өйрәтергә исәп тотабыз.

Әйткәндәй, 2015 ел йомгаклары буенча “Колос” отряды Русия Авыл хуҗалыгы министрлыгы уку йортлары конкурсында “Студентлар отрядын оештыручы иң яхшы югары уку йорты” номинациясендә өченче урын алган. “Механик”, “Тыелгысызлар”, “Мәрхә­мәт­ле йөрәк” һәм “Финансчы” отрядлары төрле номинацияләрдә Русия Авыл хуҗалыгы министрлыгы дипломнарына лаек булганнар. “Колос” отрядына быел да уңышлар телик!
Читайте нас: