+23 °С
Болытлы
Гәзиткә язылуVKOKTelegram
Барлык яңалыклар
Җәмгыять
28 июнь 2016, 02:00

Дәүләт, бизнес, халык бергә булса...

Бердәм эшчәнлек Бакалы районында күркәм нәтиҗәләр бирә.Узган шимбәдә республика Хөкүмәте Премьер-министры Рөстәм Мәрданов Бакалы районында булды. Биредә ул яңартылган кирпеч заводы һәм дәваханә эшчәнлеге белән танышты, шулай ук, район үзәгенең “Западный” микрорайонында яңа мәктәп төзелешен карады.

Марат Арсланов җитәкләгән Бакалы кирпеч заводы 2013 елдан яңа тарихын башлаган — 200 миллион сумлык төзелеш, реконструкция һәм модерни­зация эшләре башкарылган. Шуның нәтиҗәсе буларак, предприятиедә җитештерү­чәнлек нык арткан. Өч ел элек тәүлегенә 30 мең кирпеч җитештерелгән булса, бүген бу сан 70 меңгә үк җиткән.

Бакалы уңганнары ел башыннан М-125 һәм М-150 маркалы 8 миллион данә кирпеч җитештергән. Аны Бакалы һәм күрше-тирә районнарда яшәү­челәр генә түгел, хәтта чит төбәкләрдә дә көтеп алалар. Ырынбур, Самара өлкәлә­реннән үк килеп алучылар бар.

— Бүген предприятиедә барлыгы 200 кеше хезмәт сала. Алар уртача 19-20 мең сум хезмәт хакы ала. Эшчеләр хезмәт шартларыннан канәгать булсын өчен кулдан килгәннең барысын да эшләргә тырышабыз, — дип белдерде пред­приятие җитә­к­чесе.

Рөстәм Хәбиб улы яңартыл­ган район үзәк дәваханәсен карады.

Баш табиб Гөлфая Хәй­брах­манованың әйтүенә кара­ганда, дәваханәдә капиталь ремонт бина салынган вакытыннан алып, ягъни 36 ел буена булмаган. Ике ел элек район хакимияте башлыгы Александр Андреев һәм Дәүләт җыелышы-Корылтай депутаты Наил Баһаветдиновның ты­рыш­лыгы белән Социаль максатлы программалар фонды аша капиталь ремонтка акча юллап алынган. Бу максатка барлыгы 95 миллион сумны “Башнефть” компаниясе бүлгән. Нәтиҗәдә, ике ел эчендә дәваханә танымаслык булып үзгәргән. Терапия, хирургия, балалар бүлекләре, операция блогы, лаборатория, физкабинет, рентген кабинеты, авыруларны кабул итү бүлмәсе ремонтланган, моннан тыш, төп корпусның түбәсе, фасады, электр һәм инженерлык коммуникацияләре яңар­тылган, янгынга каршы сигнал бирү җайланмасы, лифт куелган.

Рөстәм Мәрданов биредә дәваланучылар белән дә якыннан аралашты.

— Яңарту эшләреннән соң дәваханәбез күзгә күренеп матурланды. Табиблар — тәнне дәваласа, биредәге матурлык җанны дәвалый. Халык сәла­мәтлеге хакына шушындый игелекле эш башкар­ганыгыз өчен мең рәхмәт сезгә, — диде Иске Корыч авылыннан килгән 81 яшьлек Рәшит Сәетов.

Рөстәм Хәбиб улы район үзәгендәге мәктәп төзелешен карады, аннары район хаки­миятендә уздырылган кризиска каршы комиссия утырышында чыгыш ясады.

— Бакалыда “Барысы да халык өчен” девизы астында күләмле эшләр алып барылуы хуплауга лаек. Киләчәктә дә шушы юнәлештән тайпылмаска — халык мәнфәгате өчен армый-талмый эшләргә кирәк, — дип белдерде Премьер-министр.
Читайте нас: