-19 °С
Болытлы
Гәзиткә язылуVKOKTelegramЯRus
Барлык яңалыклар
Җәмгыять
19 ноябрь 2016, 02:00

Яраларны өреп бәйләрбез

Уфада “Хатын-кызлар диалогы. Хәйриягә чикләр юк” халыкара форумы тәмамланды.Чараны Русия Федераль җыелышының Федерация Советы, Башкортстан Хөкүмәте, “Мәрхәмәт” хәйрия фонды оештырды. Анда Федерация Советы әгъзалары, илебез һәм төбәк власте вәкилләре, ШОС һәм БРИКС илләренең социаль юнәлештәге коммерция карамагында булмаган оешмалары лидерлары, 15 чит илдән, Русиянең 55 төбәгеннән делегатлар килде.

Форумны Русия Федерациясе Советы Рәисе урынбасары Галина Карелова ачты.

– Мондый мәртәбәле халык­ара чараны үткәрү урыны итеп Башкортстан очраклы гына сайланмады, – диде ул. – Биредә “Хәйриячелек эшчәнлегенә дәүләт ярдәме турында” Закон кабул ителгән, 300дән артык хәйрия оешмасы бар, шулай ук, бу өлкәдә Башкортстан Башлыгы янында махсус совет булдырылуы да үз нәтиҗәсен бирә. Республика тәҗрибәсен өйрәнү күпләргә фәһемле булачак.

– Чыннан да, Башкорт­станда хәйрия эшләре күпләп башкарыла, бу җәһәттән без­нең төбәк уңай үрнәк күрсәтә, – дип куәтләде аның сүзләрен республика Башлыгы Рөстәм Хәмитов. – Тыныч булмаган, катлаулы заманда изгелек тәгәрмәченең әйләнеп, елдан-ел чикләрен киңәйтеп торуы куанычлы. Мәрхәмәт­лелек бар, эшли, яши һәм аның дилбегәсе – хатын-кызларның сизгер кулларында.

Уфадагы чара узган елның сентябрендә Санкт-Петер­бургта үткән беренче Евразия хатын-кызлар форумында башланган халыкара диалогның дәвамы булды. Галина Карелова фикеренчә, мәрхәмәт­лелек социаль-мәдәни, мәга­риф өлкәләрендә генә ярдәм күрсәтеп калмыйча, чикләрен киңәйтә бара, аңа дәүләт дәрәҗәсендәге игътибарның артуы да куанычлы. Хәйрия эшчәнлегенең федераль дәрә­җәдә норматив нигезе бар, ул камилләштерелеп тора.

Бүген Русиядә җиде меңнән артык хәйрия фонды, 15 меңгә якын коммерциягә карамаган оешма эшли, 2,5 миллионнан артык кеше изге эшкә кушыл­ган. Бу хакта Русиянең халык артисты, “Мәдәният – бала­ларга” хәйриячелек фондын оештыручы Илза Лиепа болай диде:

– Русиядә мәрхәмәтлелек традицияләре бик көчле, бүген дә бу өлкәгә килергә теләүчеләр байтак. Уртак тырышлык белән без күп эшләр башкарачакбыз.

Ул Федерация Советы Рәисе Валентина Матвиен­коның Русиядә Балалар унъеллыгы игълан итү турындагы башлангычын хуплады.

“Милләт яшьлеге” хәй­риячелек фондын оештыручы Римма Баталова бу өлкәгә килү тарихын болай сөйләде:

– Спортта ярыйсы ук уңыш­ларга ирешеп, 13 паралимпия алтын медале алып, 20 дөнья рекорды куйганнан соң, бер­көнне минем янга сабый кыз килде һәм йөгерү өчен махсус аяк киемемне сорады. Мин бирдем, әлбәттә. Алар алтын булып чыкты – бу кыз хәзер үзе дә 3 тапкыр дөнья чемпионы. Шунда минем аңа гына түгел, мөмкинлекләре чикле башка балаларга да ярдәм кулы сузасым килде, шулай итеп фонд барлыкка килде. Ул балаларга гына түгел, ата-аналарга ярдәм итүне дә күз уңында тота.

Чарада хәйрия эшчән­ле­гендә уңышка ирешкән хатын-кызларга Русия Федерациясе Советы Рәисе Валентина Матвиенконың рәхмәт хатлары тапшырылды. “Йөрәк кушуы буенча” сукыр һәм начар күрүче балаларга хәйрия фондын оештыручы, Русиянең атказанган артисткасы Диана Гурцкаяга Евразия хатын-кызлар фору­мының абруйлы премиясе тапшы­рылды, аның эшчәнлеге каһар­манлык буларак билге­ләнде.

Арытаба “түгәрәк өстәл”ләр, осталык дәресләре, дискуссия мәйданчыкларында хатын-кызларның гуманитар хезмәт­тәшлек һәм хәйриячелек эш­чәнлеге турында фикер алышу булды.

Башкортстан дәүләт опера һәм балет театрында узган Гала-концертта республиканың балалар коллективлары, сәхнә йолдызлары катнашты.
Читайте нас в