“Сез – профессионаллар командасы!”

Дәүләт телерадиоком­пания­сенең төбәк депар­таменты җитәкчесе Рифат Сабитов белән “Русия телевидениесе академиясе” фонды президенты Александр Акопов та катнашкан әлеге очрашуда республикада телера­дио­тап­шырулар үсешенә бәйле мәсьәләләр тикшерелде.

Быел “ТЭФИ-Төбәк” конкурсына 560тан артык эш кабул ителгән. Башкортстан журналистлары (“Башкортостан” дәүләт телерадиокомпаниясе, Башкортстан юлдаш телевидениесе, “Вся Уфа” каналы) сигез номинациядә катнашкан.

Русия төбәк телеком­панияләре өчен зур вакыйга бул­ган “ТЭФИ-Төбәк” Бөтен­русия конкурсы унбишенче тапкыр уза. Аны Матбугат һәм киңкүләм коммуникацияләр буенча федераль агентлык ярдәме белән Русия телевидение ака­демиясе үткәрә. Конкурста төбәк теле- һәм киноком­панияләре, сту­дияләр, продюсер үзәкләре, берләш­мәләр катнаша. Быел кон­курсның финал этабына илнең 83 төбәгеннән 150 журналист килде. Кат­нашучылар һәм кунаклар өчен тренинглар, осталык дәресләре, “түгәрәк өстәл”ләр утырышлары, презен­тацияләр оештырылган иде.

“Башкортостан” дәүләт концерт залында үткән тантана республика турында видеоязма белән ачылды. Арытаба җыелучыларны төбәк Башлыгы Рөстәм Хәмитов сәламләде.

— Тантананың безнең рес­публикада, күркәм шәһәребездә узуына шатмын, — диде Рөстәм Зәки улы. — Рәсем сәнгатендә импрессионизм юнәлеше бар. Ул әлеге мизгелне иҗади күзлектән сурәтләүгә бәйле. Минем уйлавымча, “ТЭФИ” номинантлары — барысы да ихлас күңелдән эшләүче импрессионистлар. Без яхшы заманда яшибез. Моны киләчәк буыннарга да күрсәтергә кирәк. Әйдәгез, бүгенге көннән, әлеге мизгелдән тәм табыйк!

Конкурсантлар 19 номи­нациядә бәяләнде. Жюри әгъзалары үзәк каналлар вәкилләре, медиа­индустриядә танылган шәхесләр, билгеле алып баручылар, журналистлар, Русия телевидениесе акаде­миясе вәкилләре булды. Кичәне театр һәм кино актрисасы Юлия Меньшова белән билгеле спорт комментаторы Кирилл Набутов алып бардылар.

Җиңүчеләр арасында як­ташларыбызның булуы шат­лыклы. “Мәгълүмати тапшыру алып баручысы” номинациясендә — “Башкортостан” дәүләт теле­радио­компаниясеннән “Мәдә­ният яңалыклары” тапшыруын алып баручы Айгөл Кантюкова җиңде.

“Җиңү” номинациясе бүләге дә “Яңа ел могҗизасы” сюжеты өчен “Башкортостан” телера­дио­ком­па­ниясенә тапшырыл­ды.

Кичә Республика йортында Рөстәм Хәмитов “ТЭФИ-Төбәк” конкурсы, “Радиомания-2016” милли премиясе җиңүчеләре белән очрашты. Ул журналистларны тәбрикләде һәм яңадан-яңа уңышлар теләде.