Кече бизнес дөньякүләм хезмәттәшлеккә юл яра!

Форум эшендә Кыргызстан Республикасының экс-премьер-министры Джоомарт Оторбаев, Русиянең икъти­сади үсеш министры урынбасары Олег Фомичев, Русия Президентының ШОС эшләре буенча махсус вәкиле Бәхтияр Хәкимов, Русиянең Сәүдә-сәнәгать палатасы вице-президенты Елена Дыбова, республи­ка­бызның министрлык һәм ведомство җитәкчеләре, малтабарлыкка ярдәм итү буенча халыкара федераль һәм республика институтлары, биз­несны үстерү өлкәсе экспертлары катнашты.

Форумны республика Хөкүмәте Премьер-министры урынбасары Дмитрий Шаронов ачты. Ул кереш сү­зендә, кече малтабарлык субъ­ектлары арасындагы үзара бәйләнешнең нәтиҗәле механизмы булып, фәкать шундый төбәкара хезмәттәш­лек тора, дип билгеләде, форумның ШОС һәм БРИКСка керүче илләр-партнерларның һәм Русия икътисадының куәтен арттыру юнәлешендә мөһим чара булуын ассызыклады.

Әйткәндәй, рәсми мәгъ­лүматларга караганда, Ру­сиядә генә дә кече һәм урта бизнеска караучы компания­ләр саны 5,5 миллионнан артып китә. Әмма шуларның 16,5 меңнән күбрәге генә әлеге вакытта экспортер булып тора. Русия өчен бу сан бик бәләкәй. Һәм әлеге форумда, ихтимал, әлеге категориягә кергән субъектлар саны гына түгел, чит илләр белән яңа юнә­лештәге элемтәләр урнаштыручылар да артыр, дип билгеләнде.
Дмитрий Шароновның чыгышында да бу проблема чагылыш тапты.

— Без ШОС һәм БРИКСка керүче илләр төбәклә­рендәге кече малтабар­лыкка ярдәм итүне координацияләү офисын ачтык, — диде вице-премьер. — Аның төп бурычы — уңышлы дип табылган берлектәге перспектив про­ектлар өчен интернет-портал, иң яхшы эшләр каталогы, франшизалар булдыру. Аларның кайберләре тормышка ашырыла да баш­лады.

Рәсми өлештә, шулай ук, Русия Президентының Идел буе федераль округындагы тулы вәкаләтле вәкиле Михаил Бабичның форумда катнашучыларга сәламләү сүзен Башкортстан буенча федераль инспектор Михаил Закомалдин укып ишеттерде.

Форумда мәртәбәле кунак­ларның чыгышлары игътибарга лаек булды. Русиянең икътисади үсеш министры урынбасары Олег Фомичев, мәсәлән, чыгышында кризистан чыгу шартларында кече бизнесның ШОС һәм БРИКС илләре үсешендә төп драй­верның берсе булуын билгеләде.

— Кече бизнес адаптация­не тизрәк кичерергә сәләтле, ул эре компанияләр күреп бетерә алмаган мөмкин­лекләрне тоярга һәм яңа базарлар булдырырга сәләтле. Бу исә гражданнарга тиешле тормыш дәрәҗәсен булды­рырга һәм илебездә яшәештә уңайлылыклар тәэмин итәргә мөмкинлек бирә, — диде федераль ведомство вәкиле.

Русиянең Сәүдә-сәнәгать палатасы вице-президенты Елена Дыбова форум делегатлары алдында дәүләт дәрәҗәсендәге проблеманы күтәрде. Аның фикеренчә, әлегә дәүләт малтабарлыкка “юл” күрсәтергә ашыкмый һәм бизнеска аңлаешлы юнә­лешне кирәк дәрәҗәдә формалаштырмый. Шул ук ва­кытта, әлеге категориядәге субъектларга ярдәм күрсәтү чаралары турындагы тиешле мәгълүмат белән бик аз кеше хәбәрдар һәм аны алу хәтта түләүле. Ә инде каршылыкларны алып ташлауга юнә­леш алуга карамастан, бизнеста отчет бирү төрләре ике тапкыр арткан.

Дискуссияләр берничә мәйданчыкта үтте. Төрле илләрдән җыелган делегат­лар дәүләт программаларын финанслауга ия булу, керемне арттыру, франчайзинг, төбәкләрдә бизнес челтәрен үстерү мәсьәләләре буенча эшлекле сөйләшүләрдә катнашты.

Форумда Башкортстан икътисады өчен мөһим чаралар да байтак булды. Дмитрий Шаронов һәм Агнесса Осипова Башкортстан Хөкүмәте һәм коммерциягә бәйле булмаган “Ассоциация франчайзинга” оешмасы арасында үзара хезмәттәшлек турындагы килешүгә кул куйдылар. Үзара элемтәләрне ныгыту максатында, шулай ук, республика Сәүдә-сәнәгать палатасы президенты Азат Фазлыев, Күмертау шәһәре хакимияте башлыгы Борис Беляев һәм Күмертау шәһәренең “Территорияләрне үстерү буенча агентлык” муниципаль учреждениесе директоры Александр Дмитриев килешү төзеделәр.

Форумның төп максаты — Русиядәге һәм чит илләрдәге малтабарлар арасындагы элемтәләрне үстерү һәм ныгыту, компанияләрнең төбәкара проектларына ярдәм итү механизмын формалаштыру. Эшлекле очрашуларга һәм төрле илләрдән килгән делегатларның проблемаларны уртага салып тикшерүе, әлбәттә, яхшы нәтиҗә бирәчәгенә ышаныч булуын күрсәтте.

Форумның икенче көнендәге йомгаклау пленар сессиясе эшендә Башкортстан Башлыгы Рөстәм Хәмитов катнашты һәм чыгыш ясады. Ул әлеге халыкара чараның ШОС һәм БРИКС илләренә караучы төбәкләр икътисады өчен генә түгел, гомумән, икътисади кризис шартларында малтабарлыкны үстерүгә зур этәргеч бирәчәген ассызыклады, мондый мәртәбәле форумны киләчәктә дә үткәрү өчен Башкортстанның һәрвакыт әзер булуын белдерде.