“Икеле капчыклары” булырга тиеш түгел!

Киңәшмәне ачып, рес­пуб­лика җитәкчесе Башкорт­станның төп социаль-икътисади үсеш күрсәткеч­ләрендә уңай динамика күзәтелүен һәм моңа муниципалитетларның да мөһим өлеш кертүен сызык өстенә алды.

— Шуңа да муниципали­тет­ларның нәтиҗәле эш­ләве гаять мөһим әһәмияткә ия, — диде ул.

Арытаба чыгыш ясаган республика Хөкүмәте Премьер-министры урын­басары, җир һәм милек мөнәсәбәтләре министры Евгений Гурьев муниципалитетларга Икътисади үсеш министрлыгы белән бер­лектә кризиска каршы планнарына тиз арада тиешле төзәтмәләр кертергә кирәк­леген билгеләде. Биредә сүз тәү чиратта күрсәткеч­ләрнең төшүенә юл куелган һәм, шул сәбәпле, фаразланган параметрларга җитә алмау куркынычы янаган өлкәләр турында бара.

Евгений Гурьев билгелә­венчә, шулай ук, төп пред­приятиеләр белән системалы хезмәттәшлекне, дәү­ләт һәм муниципаль-шәхси партнерлык проектларын тормышка ашыруны күз уңында тотучы террито­рияләрнең инвестицион стратегиясен булдырырга кирәк.

Дәүләт һәм муниципаль милектән нәтиҗәле һәм сакчыл файдалану мәсьә­лә­сендә исә ул якын чорга төп бурыч итеп җир участокларына, шул исәптән авыл хуҗалыгы тәгаенлә­нешендәгеләренә дә, шулай ук бу участокларда урнашкан капиталь төзелеш объектларына тулы инвентаризация үткәрүне атады.

Хөкүмәт Премьер-министры урынбасары Ильяс Мөниров исә чыгышында юл һәм торак төзелеше, тө­зек­ләндерүгә бәйле мәсьә­ләләргә тукталды. Аның бил­геләвенчә, автомобиль юлларының озынлыгы буенча Башкортстан ил төбәкләре арасында беренче урынны били. Бу җәһәттән агымдагы елда гына да төбәк һәм муниципальара тәгаенләнештәге юллар төзүгә һәм төзеклән­дерүгә — 8,7 миллиард, урындагы әһәмияттәге юлларга 6,6 миллиард сум юнәлтелгән. Шул рәвешле 53 километр юл төзелгән һәм реконструкцияләнгән, 800 километрда төзеклән­дерү эшләре башкарылган.

Ильяс Мөниров чыгышында яңгыратылуынча, республика торак төзелеше буенча да әйдәүче төбәкләр исәбендә. Башкортстанда әлегә кадәр гражданнарны авария хәлендәге торактан күчерү программасы да нәтиҗәле тормышка ашырылып килде, әмма төзү­челәргә тиешле акча вакытында күчеп җитмәү сәбәп­ле, соңгы чорда яңа төзе­лүче аерым йортларны файдалануга тапшыру вакыты сузылу очраклары күзәтелә башлаган. Шуны күз уңында тотып, Ильяс Яхъя улы муниципалитетлар җитәкчеләрен әлеге мәсьәләне иң җитди игътибар үзәгенә алырга һәм тәмамланмаган төзелеш­ләр күләмен мөмкин кадәр киметергә чакырды.

Вице-премьер федераль үзәкнең, Русия шәһәр­ләрен үстерү стандартларын эшләп, террито­рия­ләрне төзекләндерү мәсьә­ләсендә үзгәрешләр әзер­ләвен дә хәбәр итте. Аларга ярашлы, төбәкләргә әлеге программаны тормышка ашыру өчен субсидия аерым шартларны үтәгән очракта гына биреләчәк. Моңа бәйле Ильяс Мөниров муниципалитетлар башлыкларына мәсьәләгә системалы килү зарурлыгын билгеләде.

Хөкүмәт Премьер-министры урынбасары Ирек Мөхәммәтдинов алдагы чорга республиканың агро­сәнәгать комплексын үстерү планын тәкъдим итте.

— Безнең алда, тиздән Хөкүмәттә тикшереләчәк 2020 елга кадәр агросә­нәгать комплексын үстерү буенча стратегиягә юнәлеш тотып, муниципалитетлар белән берлектә һәр территорияне үстерү нокталарын ачыклау бурычы тора, — диде Ирек Мөхәммәтдинов.

Ул, шулай ук, тиздән республикада кулланучылар кооперациясен һәм авыл хуҗалыгы кооперациясен үстерү буенча чаралар планы эшләнәчәген әйтте. “500 ферма” программасын тормышка ашыру исә яңа форматта дәвам итәчәк. Янә килеп бүген шәхси ярдәмче хуҗалык­ларны малтабарлык эшчән­легенә җәлеп итү буенча программа эшләнә. Ирек Мөхәммәтдинов аерым игътибарны яшь белгечләрне авыл җиренә җәлеп итү мәсьәләләренә дә юнәлтте.

Хөкүмәт Премьер-министры Салават Сәгыйтов исә республикадагы демографик хәл турында сөйлә­де. Аның белдерүенчә, агымдагы елның ун аенда республикада 46,9 мең бала туган. Шул рәвешле төбәктә халыкның табигый артуы саклана. Шул ук вакытта, аның билгеләвенчә, уңай динамиканы саклау өчен муниципалитетларда суицидлар һәм абортлар санын киметү җәһәтеннән халык арасында зур аңлату эше алып барырга кирәк. Әлегә мондый эш уңай нәтиҗә бирә. Соңгы биш елда абортлар саны 28 процентка кимегән.

Хөкүмәт Премьер-министры урынбасары Дмитрий Шаронов халыкны газ белән тәэмин итү мәсьә­ләсенә тукталды.
— Русиянең Энергетика министрлыгы таләбенә яраш­лы, халыкның сыекландырылган газга их­тыяҗы турында заявка муниципалитетлар тарафыннан расланырга тиеш. Әгәр дә кайсыдыр район әлеге заявканы вакытында тутырмый икән, ул территория халкының газсыз калу куркынычы да бар, — диде Дмитрий Шаронов.

Ул республикада халыкны гадәттән тыш хәлләр турында ашыгыч рәвештә кисәтүче комплекслы система эшләнүе турында да җиткерде.

— Урыннарда шундый комплекслар төзелә. Хәзер безнең алда аның муниципаль өлешен республика сегментына тоташтыру бурычы тора. Бу гадәттән тыш хәл барлыкка килгән очракта халыкны тиз арада кисә­тү һәм оператив рә­вештә аның нәтиҗәләрен гамәл­дән чыгару максатында эшләнә, — диде ул.

Вице-премьер, Хөкүмәт Аппараты җитәкчесе Илшат Таҗетдинов 2015 елда муниципаль районнар һәм шәһәр округлары эш­чән­­легенең нәтиҗәлелеген бәяләүче мониторинг нәти­җәләре белән таныштырды. Аңа ярашлы, шәһәр округлары арасында беренче урынны Нефтекама алды. Административ үзәк­ләре шәһәр биләмәсе бул­ган муниципаль районнар арасында тәүге урыннарны Мәләвез һәм Ишембай районнары бүлеште. Административ үзәкләре авыл биләмәсе булган муниципаль районнар арасында былтыр иң нәтиҗәле эшлә­гәннәр исемлегенә Куергазы, Тәтешле, Илеш, Бүздәк, Благовар һәм Кушнаренко районнары керде. Башкортстан Башлыгы Рөстәм Хә­митов, җиңүче муниципалитетларны тәбрикләп, аларга грантлар алу өчен сертификатлар тапшырды. Шул ук вакытта төбәк Башлыгы шушы рәвешле рейтинглар төзүнең үзмаксат булмавы, ә муниципа­литет­ларның төп үсеш өстен­лекләрен билгеләү һәм дәртләндерү максатында эшләнүен сызык өстенә алды.

— Әлегә соңгы урыннарда сөйрәлүчеләргә мө­рә­җәгать итеп, бүгенге сөйләшүдән үзегез өчен тиешле нәтиҗә ясагансыздыр, һәм инде алдагы елда ук сезне лидерлар исем­легендә күрербез, дип ышанам. Барлык муниципалитетларны да республика дәрәҗәсенә чыгара алабыз икән, бу яхшы булачак. Бездә “икеле капчык”лары һәм кәгазьдәге “лидерлар” булырга тиеш түгел. Безнең төп бурыч — барлык муниципалитетларны да югары үсеш дәрәҗәсенә чыгару, — диде Рөстәм Хәмитов, киңәшмәне йомгаклап.