Дуслык канатында яз килә!

– Бергәләп халкыбызның матур йолаларын яңарту максатында оештырдык бу бәй­рәмне, – диде Башкортстан татарлары милли-мәдәни автономиясе башкарма комитеты рәисе Римма Үтәшева. – Советлар чорында без бу бәйрәм турында ишетеп кенә белә идек. Күпчелек аны көнчы­гышта яшәүче кан-кардәш­ләребез һәм Кырым татар­лары билгеләде. Хәзер без дә Нәүрузны дуслык тантанасы буларак, ихлас күңел­дән бәйрәм итәбез.

Башкортстан – бик күп милләтләр дустанә мөнәсә­бәттә кулга-кул тотынышып яшәүче бәрәкәтле төбәк.

– Бездә һәрбер халык­ның бәләкәй генә бәйрәме дә зур чарага әйләнә. Ә Нәүруз ул – аяз күккә тиң, яңа яшәешкә омтылыш. Безнең халыклар якты өметләр белән матурлыкка омтылып яши. Бу өметләр аклансын. Бу бәйрәм башка милләт­ләргә карата ихтирам тәр­бияләү механизмына әйлән­сен иде. Бүгенге көндә бу бик мөһим. Нәүруз ты­ныч­лык бәйрәменә әвере­леп, иле­безгә имин, ямьле язлар алып килсен, – дигән теләк белдерде Башкортстан халыклары ассамблея­се рәисе Зөһрә Рәхмәтул­лина.

Әйе, Нәүруз – тарихның үзе кебек үк борынгы, ерак гасырлардан безнең көннәр­гә килеп җиткән бәйрәм. Ул халкыбызның озын юллар узуын, озын гомерле, эшчән һәм җырга-моңга бай булуын исебезгә төшерә икән, аны онытырга хакыбыз юк. Нәүруз – көнчыгыш календаре буенча Яңа елны каршылау бәйрәме. Ул озын кышны яз җиңгән вакытка, көн белән төн тигезләшкән 21-22 мартка туры килә. Бу бәйрәм язгы чәчү эшләре алдыннан атна-ун көн дәвамында үткәрелә. Карга боткасы шуның бер өлеше булып тора. Бу бәйрәмдә халыкның бөтен булмышы, йолалары, гореф-гадәтләре чагылыш таба. “Кашкадан” паркында да моның гүзәл үрнәкләрен күрергә мөмкин иде.

Бәйрәм түрендә яңа көн, яңа тормыш туу символы – кояшка үрелеп үскән ямь-яшел уҗым бөртекләре, шунда ук төрки ха­лыкларның милли хәзинәсен чагылдырган китаплар, уен кораллары, кул эшләре урнаштырылган. Һәр милләт тирмәләр янында кунакларны милли ризыклар белән каршы алды. Йолаларда халыкларны берләште­рүче бик күп уртаклыклар күренсә дә, һәрберсен аерып торучы үзенчә­лекләр дә күзгә чагылмый калмады. Әзер­байҗан милли-мәдәни үзәге тирмә­се борынгы көнкүреш әйберләре белән аерылып торса, кыргыз халкы вәкилләре әчетелгән сөттән эш­ләнгән ризыклар һәм сумса, бавырсак кебек камыр ашлары белән халыкны үзенә җәлеп итте. Төп мәйданда тезелеп киткән Төрекмән, Дагс­тан,Таҗик, Үзбәк йортлары шулай ук үзенчәлек­ләре белән күңелләрне арбады. Зәвык белән эшләнгән башкорт тирмәсе янында халык бу көнне шифалы кымыздан һәм кай­нар салмадан авыз итте. Ә Татар тарихи-мәдәни үзәге вә­килләре чигелгән сөлгеләр, паласлар белән бизәлгән палатка янында кунакларны бәлеш, өч­почмак, чәк-чәк белән сыйлады. Һәр халык бу көнне үзенә хас ачык йөз, кунакчыллык күрсәтте.

Бәйрәм җыр-бию белән үрелеп барды. Зур сәхнәгә бер-бер артлы сәнгать әһелләре күтәрелде. Борынгы бәйрәмдә балаларны катнаштыру, аларны милли сәнгать­кә һәм иҗатка җәлеп итү буыннар чыл­бырының өзелмәвенә ишарә иде.

Яңа елны ничек каршы­лыйсың, ел шулай үтә, диләр. Күрүебезчә, яңа елны, язны каршылау бәйрәме дә күбрәк шатлык, башкаларга куаныч өләшү теләге уята. Теләкләр кабул булсын!