Ул туган елда ашлык та уңган

“Син туган елны беренче тапкыр күкрәккә терәп икмәк кистек”, — дигән булган әнисе иртәнге биштә бу якты дөньяга аваз салган малайга. Ул елны ашлык бигрәк тә мул уңган. Бәлки, шуңа­дыр да, тормышы дәва­мында Ханис Ситдыйк улына эше дә, ул эшнең җимеше дә мул төшкән.
Аерым алганда, район үзәген­дәге Мәдәният сараен төзүдә роле зур була аның. Мәдәни учакны күтәрү өч ел дәвам итә, аны ачарга хәтта Мид­хәт Шакиров үзе килә.
Әйтергә кирәк, Ханис Хаҗи­мов кайда эшләсә дә уңыш казана. Башта — Мәдәният сарае, арытаба кино күрсәтү учреж­дениеләре челтәре директоры вазыйфасында хезмәт итә. Соңгысында эшлә­гән чорда коллектив республика бәй­геләрендә беренчелекне бирми.
Аннары Ханис Ситдыйк улы 10 ел сәнгать мәктәбен җитәкли, шуннан хаклы ялга китә.
— Сәнгать мәктәбендә коллектив бик талантлы булды, барысы да — рәссамнар да, музыкантлар да, җыр­чылар да! — ди ул. — Балтач сәнгать мәктәбе исеме Сочида, Одессада, Мәскәүдә, хәтта Фран­ция­дә яңгырады. Әлбәттә, бу мәк­тәп­тә талантлы балалар, укытучылар туплануына бәйле иде. Уртак эштә бердәм булганга, уңышка да ирештек.
Гомер буе миңа яхшы кеше­ләр генә очрады. Бу җәһәттән бик уңдым. Заманалар төрлечә булды, җитәкче­ләр алмашынып торды, әмма бер генә тапкыр да үземә кагылган тән­кый­ть сүзе ишетмә­дем. Тормышымнан канәгать­мен. Республиканың бөтен актерлары, иҗат коллективлары белән дус яшәдем. Әйдәүче театрлар, ан­самбльләр безгә теләп килде. Зал­ны һәрчак тутыра идек.
Журналистика исә башта мавыгу гына булды, аннан үзенә нык­лап җә­леп итте, бәйләде. “Кызыл таң” гәзитен 6нчы сыйныфта чакта ук әти белән бергәләп укый идек, ул минем — тормыш юлдашым, ә әти­нең өстәл китабы булды, һәрчак көтеп алдык.“Өмет”тә дә бик күп мәкаләләрем чыкты. Җәмгысы 300дән артык мәкаләм, күпсанлы очеркларым бар. Авыл тормышы, хезмәт кешесе турында язарга яратам. Күңелемне борчыганнар белән шулай уртаклашам. “Балтач таң­нары” район гәзит­енең, “Кызыл таң” республика гәзитенең лауреаты булдым.
Ханис әфәнде белән хатыны Җиһаниянең олы куанычы, ә бәл­ки, казанышыдыр да — аларның улы гына түгел, оныклары да туган телдә иркен сөйләшә. Менә шулай, илгә хезмәт һәм телгә хөрмәт гаиләдә үк башлана.
Хаклы ял Ханис Хаҗимов өчен бернинди дә ял түгел. Ул әле дә районда узган барлык мәдәни чараларда актив катнаша. Киңәш сораучыларга тәҗрибә уртаклаша, ярдәм сорап килүчеләрне дә борып җибәрми. Укытучылык канына сеңгән...
Ханис Ситдыйк улы укытучы гаиләсендә үскән. Биш яшендә хәреф таный башлаган, ә алты яшьлек чагында инде — кулында кызыл каләм, дәфтәр тикшерә. Җиде яшендә егет укырга төшә, биремне тиз үзләштер­гәнгә, укытучылары аңа өстәмә материал йөкли. Сәяси мәгълүмат дәреслә­рен алып баруны да аңа, актив укучыга кушалар. Сыйныф җитәк­чесе Нурдидә Шәрипова укучыларны илдәге сәяси хәлләр белән таныштыра да, һәрчак: “Политинформацияне Ханис йомгаклый”, — ди торган була. Малай ышаныч­ны аклый, тиз генә мәгълүматка анализ ясый, нәтиҗәләр чыгара. Һаман да шул активлыгын күреп, аны мәктәпнең комсомол оешмасы секретаре итеп сайлыйлар. Арытаба, Башкортстан дәүләт университетында тарих факультетында укыганда профком әгъзасы була, тулай торакта староста итеп бил­геләнә.
Укуында да һәрчак үрнәк күр­сә­тә, университетны кызыл дипломга тәмамлый. Аспирантурада уку хыялы белән авылга кайтып китә, әмма тормыш үз юлын сыза. Ханис Ха­җимов мәктәптә директор урынбасары итеп тәгаенләнә, Балтач районының Тучыбай һәм Тушкыр авылларында 8 ел тарих дәресләре алып бара. Тарих бе­лән кызыксыну әле дә тормышын ямьли, баета. Ул укытучылар, авыл­дашлары ярдә­ме белән Уразай авылы тарихын язуга кереш­кән. Әле материаллар туплана.
— Кыш — язга, көз кышка кер­гәндә күңел бигрәк тә ил­һам­ланып китә. Шулчак шигы­рьләр туа. Алары инде үзем өчен генә, яшерен көндә­лекләрдә саклана, — ди Ханис Ситдыйк улы.
Әле дә табигатьнең шундый матур мизгеле ич. Илһам һәм яңадан-яңа иҗат җимешләре телибез Сезгә, хөрмәтле Ханис Ситдыйк улы!