Китапларында – күңел дөньясы

Чара Ниязбай Сәлимовка нәкъ 60 яшь тулган матур юбилее көнендә үткәрелде. Юбилярны котларга иҗатташ дуслары, якташлары, иҗатын сөючеләр, ихтирам итүчеләр, кунаклар, студентлар җыел­ды.
Бәйрәмне Башкортстан­ның атказанган артисты Сәйдә Ильясова моңлы җыр белән ачып җибәрде.
– Укытучы иҗаты хакында сөйләү җиңел түгел, – дип сүз башлады шагыйрь Салават Әбүзәров. – Ниязбай Булатбай улы безне әдәбиятка җитәкләп алып килде. Әдәби берләшмә оештырды, безне җыйды, туп­лады. Мин армия хезмәтеннән кайтып, Стәрле­тамак химия заводына эшкә керергә йөр­гәндә ул мине район гәзитенә алып китте. Аның фатыйхасы белән матбугат өлкәсенә кереп киттем. Ниязбай Сәлимовның башкарган бихисап соклангыч эшләре, фидакарь хезмәте халкыбыз­ның күз алдында. Ихлас, яр­дәмчел кеше. Тормыш­ның үзәгендә кайнаучы шәхес ул.
Салават Нәзир улы Ниязбай Сәлимовның иҗатына да кыскача байкау ясады. Яңа чыккан шигъри җыентыгында ша­гыйрь­­нең эчке дөньясының чагылыш табуы, тормышчан әсәрләр булуы хакында сөй­ләде.
– Бүгенге чараның нәкъ шушы китапханәдә үтүенә шатмын. Мин һәрвакыт Зәки Вәлиди рухы белән яшәдем һәм яшим, – диде Ниязбай Булатбай улы. – “Телне, динне саклагыз, милли кадрлар әзерләгез!” – шушы әманәтенә таянып яшим.
Бәйрәмгә килгән БДПУ студентлары, шагыйрьнең дә, башка әдипләрнең дә шигырь­ләрен сөйләп, кичәгә ямь өстәде.
Мифтахетдин Акмулла исе­мендәге БДПУ доценты, филология фәннәре кандидаты Зөләйха Хәбибуллина, Ниязбай Булатбай улын котлап, аның икенче яңа китабы – “Шәхесләр иңендә – халкым язмышы” хакында сөйләп китте.
Кичә барышында юбилярны Башкортстанның Милли архивыннан, республиканың Диния нәзарәтеннән вәкил­ләр, ша­гыйрьләр, язучылар, дуслары, якташлары тәбрик-ләде, җылы, фәһемле чыгышлар белән чараны ямь­ләде.

Ләйсән Якупова.