+21 °С
Болытлы
Җәмгыять
19 июль 2019, 04:47
Берәүләр ярдәм көткәндә, икенчеләр “күңел ача”...
Бердәм “112” хезмәтенә шалтыратуларның яртысыннан күбрәге ялган
Бердәм “112” хезмәтенә шалтыратуларның яртысыннан күбрәге ялган
Үз гомерең өчен курку хисе кичерү – һәркемгә дә таныш тойгы. Без барыбыз да ярдәмнең теләсә кайсы вакытта, теләсә нинди шартларда тиз һәм ашыгыч рәвештә күрсәтеләчәгенә өметләнәбез һәм ышанабыз.
Башкортостанда “112” хезмәте – тиз арада ярдәм күрсәтүнең берләшкән системасы ул. “112”гә республика шәһәрләреннән һәм авылларыннан һәркем шалтыратып, тиз ярдәм алу буенча мөрәҗәгать итә ала. Кешеләр янгын, юл һәлакәте, көнүзәк проблемалар, табигать китергән бәла-казалар хакында хәбәр итә. Тиз арада бөтен мәгълүмат муниципаль берәмлекләргә караган бердәм диспетчер хезмәт-ләренә тапшырыла.
Республикада шалтыратуларны хезмәтләндерүнең “112” системасына караган бердәм үзәге эшләп килә. Тиз ярдәм күрсәтү буенча автоматлаштырылган 334 хезмәт урыны булдырылган, геомәгълүмати система да уңышлы гамәлгә ашырыла.
“112” номерын җыю белән сезнең нинди район-шәһәрдән шалтыратуыгыз теркәлә, шалтырату өзелгән очракта система автоматик рәвештә номерны яңадан җыеп, оператор белән тоташтыра. Мөрәҗә-гатьләр, шулай ук, инглиз, испан, немец, кытай, француз телләрендә булырга мөмкин, бу очракта ярдәмгә тәрҗемәчеләр килә. “112”гә шалтыратып, психологик ярдәм дә алырга мөмкин. “ЭРА-ГЛОНАСС” системасы буенча да шалтыратулар кабул ителә.
Үткән елның декабрендә Башкортстанда “112” хезмәте даими файдалануга кертелде. Хәзер шалтыратуларга автоҗавап түгел, ә оператор тавышын ишетергә була. Бу тиз ярдәм күрсәтү хезмәтләренең эшләрен оператив башкару мөмкинлеген, сыйфатын бермә-бер арттырды.
Бердәм ярдәм хезмәте диспетчерлары тәүлегенә 7 меңнән артык шалтырату кабул итә. Быел 6 ай эчендә генә алар тарафыннан 1 миллион 100 мең шалтырату эшкәртелгән. Шул ук вакытта, шалтыратуларның 52 проценты – ялган. Моңа балаларның шаярып шалтыратуын, телефон кесәдә килеш “112” хезмәте номерының автоматик җыелуын да кертергә була. Хулиганлык очраклары да юк түгел. Юк-бар шалтыратулар, кемнеңдер вакыт үткәрер өчен “112” номерын җыеп сөйләшәсе килгән очраклар да бар. Ә бит сез үзегез хәл итәрдәй мәсьәлә белән яисә шаярып “112”гә шалтыраткан вакытта кемгәдер чынлап та медицина, коткаручылар яисә янгын сүндерүчеләр ярдәме кирәк булуы бар. Шуны исегездә тотсагыз һәм “112” линиясендә юк-бар шалтыратулар белән чират булдырмасагыз иде. Өлкәннәр моны балаларга да аңла-тырга тиеш, чөнки күп очракта балалар “112” хезмәтенең нәрсәдән гыйбарәт икәнлеген белми дә, аңламый да.
Шуны да исегездән чыгармагыз: аерым очракларда ялган шалтыратулар өчен административ җаваплылык каралган. Бу бигрәк тә террорчылык белән бәйле булган ялган хәбәрләргә кагыла.
Һәрвакыт исегездә тотыгыз: тиз ярдәм күрсәтү хезмәтенә уйнап-шаярыр өчен шалтыраткан вакытта кемдер матди югалтулар кичерергә, ә тагы да аянычлысы – гомере белән хушлашырга да мөмкин...
Булат ЛАТЫЙПОВ,
республиканың Гадәттән тыш хәлләр буенча дәүләт комитетының “112” системасына чакыруларны эшкәртү үзәге җитәкчесе.
Резида ВӘЛИТОВА.
