Барлык яңалыклар
Җәмгыять
30 август 2021, 12:20

Дүртөйледә ярминкә һәм концерт булды

Узган якшәмбедә Дүртөйледә Сәламәтлек һәм актив озын гомерлелек елына багышланган чаралар узды. Төрле яшьтәгеләр өчен чаралар мәдәният сарае территориясендә, стадионда, скейт-паркта үтте, Ленин исемендәге мәйданда Элвин Грей һәм аның командасы концертын булды.

Дүртөйледә ярминкә һәм концерт булды

Дүртөйлеләр күчмә поликлиникада булды, анда балалар үзәк дәваханәсе һәм Республика клиник хастаханәсе табиблары кабул итте. Шунда ук ковид-19дан прививка ясатырга мөмкин иде. Аннары юридик ярдәм өстәле ачылды, килүчеләр белгечләрдән консультацияләр алды.

Ул арада үзешчән сәнгать осталары концерты узды, яшьләр интерактив программада катнаштылар. Стадионда мини-футбол буенча чемпионат узды, ә "Зерно" скейт-паркында – балалар-үсмерләр спорт мәктәбенең ачык ишекләре көне, анда балалар һәм аларның әти-әниләре ошаган юнәлешләрне, секцияләрне һәм түгәрәкләрне сайлый алды.

Аннан соң республиканың Сәүдә-сәнәгать палатасы оештырган авыл хуҗалыгы ярминкәсе башланды, монда үз продукциясен эшкуарлар, фермерлар һәм бакчачылар тәкъдим итте.

- Без шәһәребездә уза торган бер генә ярминкәгә дә килми калмыйбыз, чөнки нәкъ менә биредә очсыз бәягә сыйфатлы товарларны сатып алырга мөмкин. Ә бүген балаларыбыз һәм оныкларыбыз өчен сөт кухнясы продукциясен дә сатып ала алдык, - дип фикерләре белән уртаклашты Дүртөйледә яшәүче Гүзәл Миңневәлиева.

Элвин Грейның һәм башкорт эстрадасы йолдызларының чыгышлары кичәнең бизәге булды.

Фото: Дүртөйле районы хакимияте

Автор:Фануз Хабибуллин