“Коньякны уртлап кына карадым...”

Ринат (исеме үзгәртеп алын­ды) ул көнне дус кызы һәм аның туганы белән кәеф-сафа корып алырга була. “Чәй”не дә, “мәй”не дә мулдан ала – аракысы гына җитмәгән, коньягы, сырасы да була егетнең. Күңелле генә утыралар. Әмма мондый табыннарга еш кына күңелсез нокта куела – хәмер бетә. Үзләренең күпме эчкәнен исәпләмичә, “ше­шә­нең эче буш булган” дип кө­лешә шешәдәшләр. Жирәбә салып тормыйлар, егет белән кыз икәүләп тиз генә урап килергә һәм “нок­та”ны “өтер”гә төзәтергә булалар.

Кара машинасы тизлекне тиз ала, очып кына бара Ринат. “Ип­ләбрәк син, әй!” – ди кыз егеткә. “Абзаңны өйрәтмә, күпне күргән ул”, – дип кеткелди “ас водитель”. Чыннан да, моңа кадәр ул исерек килеш руль артына утырган өчен 3 елга иркеннән мәхрүм ителгән була. Әмма, адвокаты яхшы бул­гангамы, шартлы рәвештә генә.
Менә бер машинаны уза ул, икенчесен... Ничәнчесе булгандыр, әмма аның юлында туктап торган машина пәйда була. Бәре­леш! Икесе дә юл читенә мәтәлә. Ринат якындагы урман посадкасына барып төртелгәч кенә машинасын туктатуга ирешә. Көч-хәл белән үзен кулга ала ул, бә­рел­гән машинаның ишеген барып ача. Анда ике кеше булган – водитель һәм пассажир.

Булган. Хәзер үзләре юк, мәет­ләре генә сузылган.

– Мин ул көнне кунакта булдым, – дип акланырга маташа Ри­нат. – Табындагылар барысы да эчте, мин бер тапкыр коньяк, бер тапкыр сыра гына уртлап ка­радым. Үземне яхшы хис итә идем, шуңа күрә руль артына уты­­рырга куркып тормадым. Шартлы рә­вештә ирек­тән мәх­рүм ителгәч тә, водитель таныклыгын тапшырырга өлгер­мәгән идем, шуңа машинаны үзем алып барырга булдым. Юл яхшы, асфальт ко­ры. Әм­ма караң­гы тө­шеп өлгер­гән иде. Алда туктап торган машина махсус билге куймаган, габарит утларын кабызмаган иде. Мине аракы эчкәнгә тест тапшырмауда гаеплиләр. Мин анализны кан һәм бәвелдән бирергә каршы түгел идем, ә трубкага өрергә адвокатымны көттем. Бары тик шулай.

Бары шулай гына... Әмма һә­лакәт урынына килеп җиткән ЮХХДИ хезмәткәрләре, бәлага таручыларга ярдәмгә килгән узып баручылар бертавыштан Ринат­ның авызыннан аракы исе килеп торуын, үзенең адекват хәлдә булмавын әйтәләр. Ә алдагы ав­томобильнең габаритлары янып торган була.

Һәлакәт урынына туктап торган машинадагы водитель белән пасса­жирның якыннары да килеп җитә. Башта травматик шок ки­чер­гән, соңыннан шушы урында җан бир­гән га­зиз­ләрен күреп, шушы әрнеш белән гомер буена ничек яшәр­гә, кирәк... “Ничек” дияр­­гә ярамый, диләр. Әмма юлга чыгучы, бигрәк тә руль артына утыручы һәркем бөтен вариантларны да күз алдына китереп, читен хәлләрне булдырмау юлларын билгеләп куярга бурычлы. Кайсыдыр мизгелдә кинәт кенә туктарга кирәк булуы бар – тиешле тизлекне саклый­сыңмы?! Яныңа утырган пассажирлар си­ңа үз гомерен ышанып тапшырган, шуны аңлыйсыңмы!?

Ринатка бу сорауларга җавап­ны эзләргә вакыт күп бирелгән. Русия Федерациясе Җинаять кодексының 74 мәддәсенең 4нче өлеше ниге­зендә аңа карата Октябрьский шәһәр суды карары буенча 3 елга шартлы рәвештә хө­кем ителү гамәлдән чыгарыл­ган.

Русия Җинаятьләр кодек­сының 70нче мәддәсе нигезен­дә өлешчә берләштерү юлы бе­лән ахыргы җәзаны 12 елга иректән мәхрүм итү рәвешендә билгеләү каралган.
Ул бу елларны гомум режимлы холык төзәтү колония­сендә үткәрәчәк, аннан чыккач, 3 ел транспорт чаралары бе­лән идарә итүгә бәйле эшчән­лек белән шө­гыльләнү хокукына ия булмаячак.
Менә сиңа коньяк белән сыра уртлау бәласе.

Резида ВӘЛИТОВА.
(Язма Туймазы районара суды материаллары буенча әзерләнде).