Айныткычлар кайта...

Узган атнада Дәүләт җыелышы-Корылтай депутатлары бу законны беренче укуда кабул итте.

— Закон проектының асылы — республикада айныткыч­ларны оештыру өчен норматив-­хокукый база булдыру, — диде парламент Рәисе урынбасары, “Аек Башкортстан” проекты координаторы Рөстәм Ишмөхәммәтов. — Дәүләт власте органнарына тиешле вәка­ләтләр бирелә.

Депутат айныткычларны дәү­ләт яки муниципаль учреж­де­ние­ләр рәвешендә булдыру тәкъдим ителә, дип ассызыклады.

— Айныткычларны яңадан тергезергә кирәк, әмма шул ук ва­кытта аларны коммерция ки­бетенә әйләндермәү мөһим, — диде Рөстәм Ишмөхәммәтов. — Аларның төп максаты кеше­ләр­нең гомерен һәм сәламәт­леген саклау, үзләре яки аларга карата кылган хокук бозуларны кисәтү булырга тиеш. Элек мондый тәҗ­рибә киң таралган иде. Ел саен илдә эчке эшләр органнарының медицина айныткычларына 2,5-5 миллион граждан китерелгән, алар нык исерек булуы аркасында үзлә­ре йөри яки өйләренә кайта алмаган. Хәзер Русиядә елына 50 меңнән артык кеше исерек булу сәбәпле мәрхүм була. Нигез­дә, болар — эшкә яраклы кеше­ләр. Шуларның 8-10 меңе туңып үлә. Мондый кешеләрне айныганчы ябып тоту гомер­ләрен саклап калырга һәм җәмәгать тәрти­бен сакларга ярдәм итәчәк.

Документ нигезендә, законны гамәлгә ашыру 2022 елга һәм 2023 һәм 2024 ел­ларның план­лы чорына республика бюджетына салынган акчалар чиклә­рендә финансланачак. Юридик яктан айныткычлар, махсус эчке эшләр учрежде­ниеләре буларак, 2010 елда гына эшләүдән туктады.

— 2010 елда Эчке эшләр министрлыгын реформалау һәм милиция базасында полиция төзү башлангач, Хөкүмәт айныткычларны Эчке эшләр министрлыгы структурасыннан сәламәтлек саклау системасына тапшырырга кирәк дигән башлангыч белән чыкты, — ди Дәүләт думасы депутаты, айныткычлар турындагы закон авторларының берсе Александр Хинштейн. — Илнең ул чактагы җитәкчелеге бу карар­ны нәкъ алар канаты астында хуплады. Шуңа күрә 2012 ел­ның 1 гыйнварыннан кабул ител­гән һәм эшли башлаган “Полиция турында”гы закон кысаларында, медицина айныт­кыч­­лары, структур берәмлек буларак, эшләми башлады.

Фото: уфа1.ру