Ачык кое — куркыныч чыганагы

Яз килү белән халыкның социаль челтәрләрдә язган мөрәҗәгатьләре темасы да үзгәрә. Кышын күбрәк кар күплегенә, боз сөңгеләренә зарлансалар, язын инде җир кардан арчылуга пәйда булган тәртипсезлекләр, пычраклык, ачык кое капкачлары турында язмалар өстенлек итә. Соңгылары халыкка бигрәк нык куркыныч яный.

Әйтик, Благовещен районында яшәүче Наталья Фазылова, хакимият­нең социаль челтәренә мөрәҗәгать итеп, Д. Бедный урамы буенча урнашкан 35нче йорт каршындагы люкны ябуны сораган. Шул ук көнне районның Төзекләндерү һәм карап-тоту идарәсе хезмәткәрләре ачык коены вакытлыча плитә белән япкан, ә берничә көннән әлеге проблеманы ныклап хәл иткәннәр.

Башкортстан ЦУРына кер­гән мөрәҗәгатьләрне анализлау күрсәтүенчә, бу — язын еш очрый торган пробле­маларның берсе. Кыш көне аларны ишегалларын кардан чистартканда трактор чүмече кузгата. Яз көне су тизрәк китсен өчен халык еш кына үзләре ача. Кызганычка каршы, люкларны урлыйлар да әле.

Зинһар, игътибарлы булыгыз! Әгәр люк ачык икән, “112” хезмәтенә шалтыратыгыз, ул тәүлек әйләнәсенә эшли.

Уфадан Гөлшат Гәрәева кыштан соң ишегалды терри­ториясенең начар хәлдә булуына борчыла. Ул социаль челтәрләрдә шик-шөбһәләре белән уртаклашкан. Ханым “Дачный” урамы буенча урнашкан биш катлы йорт янындагы ватылган койманы фотога төшергән һәм 5 апрельдә фотоны ЦУРның “ВК” төрке­мендә бастырган. Ә инде 8 апрельдә Уфа шәһәренең Совет районы хакимияте хез­мәткәре Мәрьям Шаһидул­лина, идарәче компания территорияне тәртипкә китерде, коймаларны ремонтлап буядылар, дип хәбәр итте. Бу — гражданнарның ши­каять­ләренә тиз җавап бирү­нең лаеклы үрнәге.

Шәһәрнең барлык ихаталарында да тәртип булсын. Һәм исегезгә төшерәбез, шикаять­ләргә юл куймау яхшырак. Башкортстан белән идарә итү үзәгенең мәгълүмати сис­темаларына эләккән хәбәр­ләрдән тагын бер мисал. Уфада Үзәк базар янындагы юлга бәйле проблема турында битараф булмаган кеше 10 апрельдә язган. Ике көннән соң Ленин районы хакимияте хезмәткәрләре башкарылган эшләр турында хисап тотты: Революцион урамдагы чокырны ямаганнар. ЦУРның мәгълүмат системасында Уфа районында яшәүче бер хатынның мөрә­җәгатен тотып алганнар. Ул электр челтәрләрендәге авария проблемасын хәл итүне сораган. Баксаң, “Калинка”, “Пчеловод” һәм “Ивушки” бакчачылык ширкәт­ләренең 30 шәхси биләмәсе утсыз калган икән.

“Идарә итү үзәге һәм Сәнәгать һәм энергетика министрлыгы командалары бер­ләшеп, авария нәтиҗә­ләрен бетерделәр һәм халыкка ут бирделәр”, — диелгән җа­вапта. Резеда ГАЛИКӘЕВА.