"Фура астына барып керәсем килде"

Бәхетсезлек Нефтекамада яшәүче 36 яшьлек Ирина Сәлаховага бер-бер артлы килә. Мартта хатын ирен коточкыч юл-транспорт һәлакәтендә югалтты һәм кечкенә биш бала белән ялгызы калды. Әмма, әйтелгәнчә, бәла үзе генә килми - май аенда күпбалалы ананың ире үлгәннән соң балалары белән бергә яшәргә планлаштырган йорты бер сәгать эчендә янды. Хәзер ятим калган гаилә битараф булмаган кешеләрдән ярдәмгә мохтаҗ.

Ирина һәм Данил Сәлаховлар гаиләсе әйләнә-тирәдәгеләр өчен һәрвакыт үрнәк булды: сокландыргыч биш бала, җитеш тормыш. Ләкин 2022 елның 11 мартында Иринаның ире авариядә һәлак була. Төн уртасына таба 35 яшьлек ир-егет эшләр буенча киткән. Илеш районына барганда аның "девятка"сы "Вольво" фурасы белән бәрелешә. Бәрелүдән машина әйләнә, водительгә исән калу мөмкинлеге дә булмый. Данил авария урынында табиблар килгәнче үк үлгән.

- Барыннан да нык шушы минутта аның белән булмавымны кичерә алмыйм. Мин тыныч кына өйдә йоклый идем, бер секундта биш балалы тол хатынга әйләндем. Беренче көннәрдә машинага утырасы һәм аның кебек берәр фурага бәреләсе килә иде, ләкин балалар бар... - ди хатын.

Ирен югалтканнан соң бераз тынычлангач, Ирина Сәлахова ире белән бергә төзи башлаган йорттагы эшләрне ахырына җиткерергә алынган.
- Эш һәм планнар күп иде. Барлык акчаны балаларны үстерү, аларны уңайлы шартларда яшәтү, иремнең туган ягында, аның каберенә якында яшәү өчен тотындым. Әмма бу хыяллар 25 майда җимерелде, өй нигезенә кадәр янып бетте, - дип яза Ирина социаль челтәрләрдә.

Ул вакытта гаилә кайгысына битараф булмаган кешеләр ярдәмгә килгән, алар балалар өчен кирәкле киемнәрне җыйган һәм матди ярдәм күрсәткән. Әмма алда - яңа йорт төзү өчен агач сатып алырга, эшче-төзүчеләр ялларга һәм бер үк вакытта арендага алынган фатирга түләргә кирәк, Ирина хәзер балалары белән яши. Моннан тыш, яңа йортка ут, газ һәм су үткәрергә, тәрәзәләр һәм ишекләр куярга, шулай ук беренче вакытта яшәү өчен иң кирәкле әйберләрне сатып алырга кирәк.

- Күпләр миңа боларның барысын да күтәрә алмавымны әйтә. Хәтта участокны сатарга киңәш итәләр. Ләкин җыелган акчага мин нәрсә ала алам? Мәктәп һәм кибет булмаган ерак авылдагы иске өйме? Мин берни дә барып чыкмаячак дип уйлый алмыйм! Минем бурыч - балаларны яхшы йортта яшәтү, аларны уңайлылыкта үстерү, минем көчемнән килгәннең барысын да эшләү, - ди ул.

Хәзер Ирина битараф булмаган кешеләр ярдәменә өмет итә. Әгәр сез дә кечкенә балалар белән тол калган хатынга ярдәм итәргә теләсәгез, көчегездән килгәнчә өлеш кертә аласыз: 5536914135600728 (Салахова Ирина Раильевна), 2202200966857136 (мама Ирины - Мустафина Назиля Шакирьяновна).