Красноусолда мөһим хезмәтнең үз бинасы булачак

Утырыш эшендә республика ведомстволары һәм төзелеш эшләрен башкаручы подрядчы оешма вәкилләре катнашты.

Ирек Сәгыйтов билгеләп үткәнчә, Красноусол авылында янгын-коткару депосын төзү Башкортстан Башлыгының «2024 елга кадәр Башкортстан Республикасын социаль-икътисади үстерүнең стратегик юнәлешләре турында» һәм «2030 елга кадәрге чорга Башкортстан Республикасы территориясендә янгын-коткару көчләрен үстерү стратегиясе турында»гы указлары кысаларында каралган.

- Янгын-коткару частеның гамәлдәге бинасы 1937 елда төзелгән, 2011 елда авария хәлендә дип табылган. Башкортстан Хөкүмәте боерыгы белән янгын-коткару часте төзүне финанслау билгеләнде. Ике катлы яңа янгын-коткару депосының гомум мәйданы 1,5 мең квадрат метр тәшкил итәчәк. Бүлекчәнең реакция зонасында 30 меңнән артык кеше яшәүче 96 торак пункт исәпләнә, - дип хәбәр итте вице-премьер.

Шулай ук киңәшмәдә катнашучылар оператив эшне оештыру мәсьәләләре буенча фикер алышты.

- Янгын-коткару частеның яңа бинасын төзү - республиканың социаль-икътисади үсешенең стратегик юнәлешләренең берсе. Әлеге объектта хезмәтне МЧСның Башкортстан буенча Баш идарәсенең Федераль янгынга каршы хезмәт бүлекчәсе алып барачак, – дип нәтиҗә ясады Ирек Сәгыйтов.

Объект төзелешен 2023 ел ахырында тәмамлау планлаштырыла.