Янгын чыкмасын өчен!

18 ноябрьдә республика Хөкүмәте Премьер-министры урынбасары Ирек Сәгыйтов рәислегендә Гадәттән тыш хәлләрне кисәтү һәм янгын хәвефсезлеген тәэмин итү комиссиясенең чираттан тыш утырышы узды. Чарада видеоконференцэлемтә режимында муниципаль районнар, шәһәр округлары, шулай ук республиканың авыл җирлекләре хакимият башлыклары катнашты.

Вице-премьер бүген республикада берьюлы берничә кешенең гомерен алып киткән янгын турында искәртте. Иртә белән Стәрлетамак районындагы янгын турында хәбәр килде. Күп балалы гаилә яшәгән торак йортның фатиры янган. Янгын нәтиҗәсендә ике ата-ана һәм 5 яшьтән алып 13 яшькә кадәрге 5 бала үлде.

- Башкортстан Республикасы башлыгы йөкләве буенча фаҗиганең барлык шартларын ачыклау өчен оператив штаб булдырылды. Хәзерге вакытта Русия Федерациясе Тикшерү комитетының Башкортстан Республикасы буенча Тикшерү идарәсе тарафыннан кешеләр үлеме факты буенча Русия Җинаять кодексының 109нчы маддәсенең 3нче бүлеге буенча "Ике һәм аннан да күбрәк кешегә саксызлык аркасында үлемгә китерү" буенча җинаять эше кузгатылган. Янгын сәбәпләре билгеләнә. Бүгенге көндә һәлак булганнарны җирләүне оештыруда ярдәм күрсәтү, янгын вакытында зыян күргән чиктәш фатирның түбәсен ремонтлау мәсьәләләре хәл ителә, - диде Ирек Сәгыйтов.

Әлегә билгеле булганча, янгын чыгуның төп сәбәпләре булып электр җиһазларын, мичләрне җылыту һәм эксплуатацияләү кагыйдәләрен бозу һәм ут белән саксыз эш итү кала.

Фото: pravitelstvorb.ru