"Шүлгәнташ" дусларын җыйды

Фестиваль «Шүлгәнташ мәгарәсе» музей-тыюлыгы кубогына традицион җәядән ату буенча республика турниры ачылышыннан башланды, ул Башкортстанның иң көчле 50 укчысын җыйды. Турнир иртәнге 10да старт алды һәм кичен тәмамланды. Традицион милли киемдә укчылар бәйгесе фестивальнең бизәге булды.

Фестивальгә килгән кунаклар турнир тәмамланганчы уктан ату буенча мастер-класста катнаша алды.
Көч сынашырга теләүчеләр өчен «Урал токымнары» халык спорт уеннары оештырылды. Балалар да, өлкәннәр дә аркан тартты, дубина ыргытты, бүрәнәдә капчык белән көч сынашты.

Якын-тирә авылларда яшәүчеләр һәм «Агинәйләр» самавыр чәе һәм коймак белән сыйлады, күргәзмә-ярминкә оештырды.
Фестиваль башкорт эстрадасы артистлары Сәгыйдулла Байегет, Зилә Бәхтиева, «Янбикә», «Йәнгүзәл» һәм «Умырзая» фольклор коллективлары катнашлыгында концерт белән тәмамланды.

Кышкы уеннарда Башкортстан кунагы, «Нижневартовская НИПИнефть» җәмгыяте генеральный директоры Виктор Белозеров катнашты. Ул бәйрәмнең башкорт традицияләре – бердәмлек, дуслык рухында узуын билгеләп үтте. Шулай ук Белозеровлар музей белән сокланды. Кунаклар экспозициянең кызыклы бизәлешен билгеләп үтте, шулай ук аларга мәгарә дивары фрагментларының күчермәләре ошады.

Музей комплексының үсеш өчен зур потенциалы барлыгын республика Хөкүмәте Аппараты җитәкчесе Азат Абдрахманов та әйтте. Бу көнне ул якыннарын музейга алып килде.

- Шүлгәнташ мәгарәсе - Көньяк Уралның, хәтта Русиянең могҗизаларының берсе. Музей-тыюлык белгечләре әйтүенчә, мәгарәне өйрәнүдә без юлның башында гына. Шуңа күрә музей биналарны яңа экспонатлар, яңа мәгълүматлар белән тулыландыру өчен зур потенциалга ия. Туган як тарихын, археологияне яхшы беләм. Минем өчен музейда «Урал-батыр» башкорт эпосы һәм мәгарәдә табылган экспонатлар белән турыдан-туры бәйләнеш күрсәтелүе мөһим. Әлеге проектны гамәлгә ашырган өчен республика Башлыгы Радий Фәрит улы Хәбировка рәхмәт. Музейны үз күзләрең белән күрергә кирәк. Монда бөтен кешелек тарихы күрсәтелә. Киләчәктә тарихчылар һәм археологлар мәдәният нәкъ менә биредә, Уралда барлыкка килгән дип әйтерләр, - дип билгеләп үтте Азат Абдрахманов.