Благовар белән Бүздәк дуслыгы ныгый

Совет чорында, КПСС идеологиясенә ярашлы, республикада күрше районнар, шулай ук шәһәрләр арасында социаль-икътисади яктан ныклы бәйләнешләр булдырылган иде. Бу социалистик хезмәт бәйгесен оештыруда чагылыш тапты, атап әйткәндә, Благовар һәм Бүздәк үзара ярышучы районнар саналды. Төбәк дәрәҗәсендәге чараларга мотлак рәвештә күрше районнар вәкилләре чакырылып, алар алдынгы тәҗрибә уртаклашу форматында үтте.

Мондый бәйләнешләрнең социаль һәм икътисади үсешкә уңай йогынтысын инкарь итү мөмкин түгел. Әмма иң мөһи­ме – районнар арасында урнаштырылган ныклы элемтә­ләр ике төбәк халкын берләш­терүгә дә хезмәт итте.
Бүздәк район Советы рәи­се Рамил Са­лихов хәзерге чорда күрше Благовар районы белән бәйләнешләрне тергезү зарурлыгын менә шушы яссылыкта күрә. Рамил Мөсәлим улы, озак еллар дәва­мында Бүздәк район электр челтәр­ләре ( РЭС) коллективына җитәкчелек итеп, аны тугыз район кергән Октябрьский электр берләшмәсендә алдынгылар сафына чыгара алды. Бүздәкнең бай тәҗ­рибәле энергетигы РЭСлар эшчән­ле­ген­дә үзара хезмәттәш­лек­нең йөклә­тел­гән бурычларны үтәүдә уңай йогынтысын да яхшы белә, чөнки күрше район­нар­да­гы коллегалары белән аралашып эш­ләр­гә омтылды. Благовар РЭСы коллек­ти­вы белән хезмәттәш­лек нәтиҗәләре исә гомум эш­чәнлектә дә чагылыш тапты.
Лаеклы ялга чыкканнан соң, 2020 ел­да Рамил Мөсә­лим улына төбәк депутатлары тарафыннан район Советы рәисе вазыйфасы йөкләтелде. Шуңа да ике район арасында рәсми бәйлә­неш­ләрне тер­гезүдә тәүге адым­нарның муниципаль хез­мәт­ләр дәрәҗә­сендә ясалуы гаҗәп түгел.
Былтыр 31 мартта Бүздәк районы делегациясе Благовар районының Алексеевка авылы биләмәсендә эш сәфәр­ендә булды. Районара беренче чара күчмә семинар-киңә­шмә рәве­шендә оештырылды, анда ике төбәкнең авыл билә­мәләре хакимияте башлыклары һәм районнар Советлары депутатлары катнашты. Берлектәге очра­шуның төп максаты итеп төбәк­ләр арасында эшлекле мөнә­сәбәтләр урнаштыру, аларны ныгыту һәм киләчәктә үстерү куелды, шулай ук урындагы үзидарә мәсьәләләре буенча алдынгы тәҗрибә уртаклашу торды.
– Һәр район тарихында мондый юнәлештәге күмәк чара соңгы чорда беренче тапкыр гына оештырылса да, без аның гаять вакытлы булуын, эшне җанландыруга этәргеч бирә­чәгенә тиз арада төшендек, – дип искә ала Рамил Мөсәлим улы. – Җылы һәм эшлекле шарт­ларда үткән “түгәрәк өстәл”дә депутатлар өлгереп җиткән күп кенә мәсьәләләрне күтәрде, аларны хәл итү юлларын билгеләде. Ныклы социаль үсешкә иреш­кән Алексеевка авыл билә­мәсенең мәдәни-мәгариф объектлары белән якыннан танышу Бүздәк депутатларында зур кызыксыну уятты, чөнки мон­да эшчәнлектә файдаланырлык бай тәҗрибә ­үр­нәк­­ләре күп иде.
Төбәкара бәйләнешләр үткән елда Бүздәктә зур уңыш белән үткән “Бәлешфест” милли ризык фестивалендә дәвам итте. Благовар районы делегациясе, бәйрәмнең кадерле кунаклары сыйфатында кабул ителеп, аларга барлык чараларда катнашу өчен мөмкин­лекләр тудырылды.
Үзара бәйләнешләр быел да дәвам итә, бу юнәлештә чаралар планы расланган. Фев­ральдә Бүздәк район Советы рәисе Рамил Салихов эш тәҗ­рибәсе белән уртаклашу максатында Благовар районы Совет­ының узган ел йомгакларына багышланган киңәйтелгән утырышында катнашты.
Февраль ахырында исә Благовар районы хакимияте башлыгы Марат Йосыпов, район Советы рәисе Равил Гомәров, Совет секретаре Наилә Садыйкова составындагы делегация Бүздәк район Советының 32нче утырышына чакырылды, анда ике район башлыгының хезмәт­тәшлек турында муниципалитетара килешүгә кул кую чарасы үтте.
– Безнең районнарны уртак омтылышлар берләштерә, төбәк халыклары озак еллар дәва­мында аралашып яши, дуслык һәм татулыкта гомер кичерә, – диде Бүздәк районы хакимияте башлыгы Илнур Игъдиев. –Хәзерге катлаулы чорда бер­ләшү таләп ителә, чөнки бер-береңә ярдәм итү бик кирәк. Моны моңарчы Уфа­ның Киров районы белән хезмәт­тәшлек турында төзел­гән килешүдән чыгып расларга мөмкин. Благовар һәм Бүздәк районнары рес­публиканың нык үсешкән төбәк­ләре санала, ныклы икътисади бәйлә­нешләр булдырып, без тагын да зуррак уңышларга ирешербез, дип исәплим.
Благовар районы хакимияте башлыгы Марат Йосыпов та ихлас теләкләргә кушылды.
Районара килешүдә билге­ләнүенчә, күрше төбәкләр өчен аеруча мөһим документта хокуклар белән бергә бурычлар да анык күрсәтелгән, алар үзара хезмәттәшлекнең нигезе булып тора һәм нәтиҗәле эшчәнлектә зур мөмкинлекләр ача. Ике район өчен дә файдалы бердәм проектларны тормышка ашыру өчен исә килешү хокукый яктан нигезләнгән.

Фәнүр Гыйльманов,
“Кызыл таң”ның үз хәбәрчесе.