Ялган ломбардларның эше чикләнәчәк

Закон проекты белән төбәк һәм муниципаль власть­ларга комиссион кибетләренең эш режимын билгеләү буенча вәкаләтләр бирү тәкъдим ителә, – диде Дәүләт җыелышы Рәисе Константин Толкачев. – Бу чара легаль булмаган ломбард эшчәнлеген чикләргә мөмкинлек бирәчәк, чөнки беркем өчен дә сер түгел, еш кына “комиссионка”лар офисларында күчемле милек залогына кыска вакытлы куллану кредитлары бирү буенча килешүләр төзелә, ягъни кибетләр ломбард эшчәнлеге белән шөгыль­ләнә”.

Хокук саклау органнары, Русия Банкы белән бер­лектә, комиссион кибетләре офисларында законсыз эш­чәнлек алып бару факт­ларын даими ачыклый. Регулятор тарафыннан бас­тырылган “Финанс базарында легаль булмаган эш­чәнлек билгеләре ачыкланган компанияләр исем­ле­ге”нә “легаль булмаган кредитор” билгесе белән 340тан артык кибет кер­телгән.

Мондый эшчәнлектә урланган милекне сатып алу белән бәйле җинаятьчел хокук бозу билгеләре бар. Парламент спикеры фикеренчә, комиссион кибетләренең эш вакытын чикләү легаль булмаган операцияләр күләмен киметәчәк, чөнки ялган ломбардларның активлыгы нәкъ төнге вакытта арта. “Ялган ломбардлар алар өчен закон нигезендә билге­ләнгән чикләүләр белән бәйле түгел, һәм бу аларга өстенлекләр бирә, — диде Константин Толкачев. — Легаль ломбардлар урындагы вакыт буенча 8дән 23 сәгатькә кадәр генә эшли ала. Алар үз эшчәнлекләре турында даими рәвештә хисап бирергә, залогка куелган милекне страховкаларга һәм финанс тотрыклылыгын тәэмин итү өчен мәҗбүри нормативларны үтәргә тиеш.

Комиссион кибетләре очракларында андый нәрсә юк. “Комиссионка”ларның легаль булмаган ломбард эшчәнлеге заемчы граждан­нарның милек мәнфәгать­ләренә зыян китерергә мөмкин. Легаль булмаган кредитор займ биргән өчен шактый зур түләү алала, чөнки Русия Банкы билге­ләгән чик күләмнәрен үтәргә тиеш түгел. Страховкаланмаган милекне югалту яки бозу куркынычы бар.