Кырау суккан мәйданнар яңадан чәчеләчәк

Кичә республика Башлыгы Радий Хәбиров чираттагы оператив киңәшмә үткәрде. Анда Башкортстан өчен иң актуаль бул­ган мәсьәләләр каралды.

Хөкүмәт вице-премьеры, сәнә­гать, энергетика һәм инновация­ләр министры Александр Шельдяев 16-21 майда Башкортстан делегациясенең Иранга сәфәре йомгаклары турында сөйләде. Иран

— Башкортстан өчен өстен­лекле тышкы икътисади юнәлеш­ләрнең берсе. Башкортстан-Иран мөнәсәбәтләренең уңай динамикасы агымдагы елның I кварталында тышкы сәүдә әйләнеше үсешенең, узган елның шул ук чо­ры белән чагыштырганда, 14 тапкыр артуы белән раслана. Республика стендында 9 компания, шул исәптән кече һәм урта эшкуарлык­ка караган 8 предприятие тәкъдим ителгән. Иранда булган вакытта Башкортстан вәкил­ләре 1 меңгә якын сөйләшү үткәр­гән, алар буенча килешүләр имзаланган.

Республикада быел 59 муниципалитет территориясендә 148 пляж ачылачак. Хәзерге вакытта 117 пляж ачылуга әзер. Гадәттән тыш хәлләр буенча дәүләт комитеты җитәкчесе Фәрит Гомәров хәбәр итүенчә, Куергазы, Мишкә һәм Федоровка районнарында пляжлар ачу планлаштырылмый. “Мин ни өчен бу районнарның пляжлар ачарга теләмәвен аңлап бетермим. Анда елгалар да бар. Югыйсә, бу муниципалитетның гына вәкаләте, анда бик аз күләмдә эш башкарырга: сулык төбен чистартырга, ком тутырырга, коткаручылар билгеләргә генә кирәк. Теләгән муниципалитетлар бу эшне башкара. Сез дә эшлә­гез!” — диде республика Башлыгы Радий Хәбиров.

Башкортстанда бер тәүлектә коронавирус инфекциясе йокты-руның 92 очрагы ачыкланган. Стационар дәвалануда — 123 пациент, амбулатор дәвалануда 1278 кеше исәпләнә. Бу хакта сәламәт­лек саклау министры Айрат Рәх­мә­туллин хәбәр итте. Республи­каның йогышлы авырулар госпи­таль­­ләрендә коронавирусны дә­валау өчен 235 койка җәелде­релгән. Ирекле койка фонды 17 процент тәшкил итә.

Уфада тимер юл вокзалын реконструкцияләүнең 2024-25 елларга планлаштырылган икенче этабы Вокзал урамы буенча автомобиль юлында җир асты җәяү­леләр кичүен төзүне күздә тота. Бу хакта транспорт һәм юл хуҗа­лыгы министры вазыйфаларын башкаручы Руслан Гарипов хәбәр итте. Моннан тыш, җир асты тоннелен реконструкцияләү һәм 4нче платформага кадәр озайту, 2нче һәм 3нче платформаларны рекон­струкцияләү һәм аз хәрәкәтләнүче гражданнар өчен лифтлар урнаштыру башкарылачак.

Үзенең чыгышында Уфа мэры Ратмир Мәүлиев җир асты җәяү­леләр кичүен төзү эшләре 2024 елда башланачагын билгеләп үтте. “Бүгенге көндә кешеләр югарыдагы кичү буенча үтеп йөри. Чыгымнар шактый зур, 34 миллион сум таләп ителә. Әгәр сез безгә вакыт бирсәгез, киләсе елга бу сумманы бюджетка кертергә планлаштырыр һәм эшләр әкрен­ләп оештырылыр иде”, — диде Ратмир Мәүлиев. Радий Хәбиров киләсе елга эшләрнең төгәлләнүе турында отчет бирергә кушты.

Башкортстанда язгы чәчү тәмамлана. 8 район чәчүне тулысынча төгәлләгән, 23 район якын көннәрдә тәмамлаячак. Калган районнарда соң культуралар чәчелә. Республика буенча 22 майга планлаштырылган мәй­даннарның 90 процентына язгы культуралар чәчелгән. Кызганычка каршы, 5-12 майда кырау төшү аркасында 31 муниципалитет территория­сендә авыл хуҗалыгы культура­ларының һәлак булуы теркәлгән. Шикәр чөгендере, арпа, рапс һәм башка культуралар 120 мең гектарда зыян күргән. Шулар­ның 91,5 мең гектарында культуралар һәлак булган, бу мәйданнар яңа­дан чәчелергә тиеш. Якынча исәпләүләр буенча, зыян күләме 590 миллион сумнан күбрәк дип бәяләнә. Иң нык зыян күрүчеләр — Бакалы, Илеш, Шаран һәм Чакмагыш районнарындагы чәчүлек­ләр. Бу хакта вице-премьер, авыл хуҗалыгы министры Илшат Фазрахманов хәбәр итте.

Быел театр-концерт оешмалары яңа автотранспорт чаралары белән тулысынча яңадан җиһазландырылачак. Бу хакта мәдәният министры Әминә Шә­фыйкова белдерде. “532 миллион сумлык 94 транспорт берәмлеге сатып алынган инде. Дәүләт мәдәният учреждение­ләренә 7 “НефАЗ” автобусы тапшырылды, ә 26 майда 26 берәмлек автотранспорт ачкычы тапшырылачак, — диде Әминә Шәфыйкова. — Бу аларга республика халкын сәнгатькә тагын да ныграк җәлеп итәргә мөмкинлек бирәчәк”.