Коррупция 2 триллион доллар зыян китерә

 — Коррупция дөньякүләм икътисадка 2 триллион долларга якын зыян китерә, бу — тулай продуктның якынча 2 проценты. Барлык ачларны ашату һәм медицина ярдәме күрсәтү өчен 6 тапкыр азрак — якынча 320 миллиард доллар кирәк. Коррупциянең бүгенге дөньядагы иң куркыныч һәм җимергеч проблемаларның берсе булып саналуы юкка түгел. Русия икътисады, шулай ук, коррупциячел җинаятьләрдән интегә: Генераль прокуратура мәгълүматлары буенча, узган ел китерелгән зыян гына 37 миллиард сумнан артып китте, — дип билгеләде Андрей Назаров.

Төбәк коррупциягә каршы комплаенс системасы формалашкан һәм үсә. Ул үз эченә 6 элементны ала.

Беренчесе — норматив хокукый актлар проектларының эчтәлеген тикшереп тору. Икенчесе — инвестиция эшчәнлегендә идарә процессларының үтәкүренмәлелеген арттыру, бюрократияне бетерү, эшне гадиләштерү. Тагын бер элемент — "Дәүләт хезмәтләре" төрендәге онлайн-платформаларны кертү. Дүртенче элемент — дәүләт һәм муниципаль сатып алуларны үзәкләштерү. Бишенче элемент — проектларны озата бару һәм контрольне көчәйтү.

Хөкүмәт Рәисе билгеләп үтүенчә, системаның алтынчы элементы — мәгълүматлар аналитигы һәм ясалма интеллект кебек заманча мәгълүмат технологияләрен куллану. Коррупциягә каршы көрәш — даими игътибар һәм көч таләп итә торган озайлы процесс. Бу закон чыгару һәм сәяси чаралар мәсьәләсе генә түгел, ә иҗтимагый аңның үзгәрүе дә.

Форум кысаларында Башкортстан Республикасы Хөкүмәте Премьер-министры Андрей Назаров граф А.И. Васильев медале белән бүләкләнде.