Халыкны тыгыннар борчый...

Кичә Хөкүмәттә үткән оператив киңәшмәне Премьер-министр Андрей Назаров алып барды. Анда республика делегацияләренең Казахстанга, Абхазиягә сәфәрләре нәтиҗәләре каралды. Аерым алганда, ел ахырына кадәр Казахстанда Башкортстанның рәсми вәкиллеге ачылачак, дип хәбәр итте тышкы икътисади элемтәләр һәм конгресс эшчәнлеге министры Маргарита Болычева. Якын арада Башкортстанга рәсми сәфәр белән Казахстан Премьер-министры Алихан Смаилов киләчәк. Ә Республика көнендә Абхазия Президенты Хакимияте җитәкчесе Абесалом Кварчияне көтәләр.

Узган атнада республика халкы социаль челтәрләрдә күпчелек юллар торышына зарланган. Халыкны аеруча ремонт эшләре җәелдерелү сәбәпле, юллардагы тыгыннар борчый. Уфа халкы Шакша күпере, Зинино юлүткәргече тирәсендәге, Зәки Вәлиди урамындагы тыгыннарга зарлана: җомга көнне шәһәр­дән чыгу өчен агым Телеүзәктән үк сузылган. Шушыларны истә тотып, Уфада ремонт чорына һәм мәдәни-киңкүләм чаралар үткәрү вакытына юлларны ябуны регламентлаштыру зарур. Мондый башлангыч белән Башкорт­станның Транспорт һәм юл хуҗалыгы министрлыгына ЦУРдан чыктылар, дип хәбәр итте оператив киңәшмәдә Башкортстан Башлыгының Социаль коммуни­кацияләр идарәсе җитәкчесе Елена Прочаковская. Ул билгеләп үтүенчә, хәзер Башкортстан башкаласында моңарчы күрелмәгән санда юллар һәм күперләр ремонтлана, бу, үз чиратында, зур тыгыннар китереп чыгара.

“Һичшиксез, болар барысы да мөһим һәм кирәк. Шул ук вакытта безгә бик кирәк булган чаралар да уза. Шулай да, юлларны ябулар җайга салынсын иде. Эшне башларга кирәк булганда гына түгел, ә хәлне килештерү белән башлау зарур. Һәм без Транспорт һәм юл хуҗалыгы министрлыгыннан юлларны ябу регламентын төзүне үз өстенә алуын сорар идек”, — дип мөрәҗәгать итте Башкортстан Хөкүмәте Премьер-министрына Елена Прочаковская. Андрей Назаров аның сүзләре белән килеште һәм якын арада тыгыннар проблемасын хәл итү юлларын әзерләргә кушты.

“Анализ күрсәтүенчә, тыгыннар беренче чиратта юл эшләренә һәм авария­ләр нәтиҗәсендә чик­ләүләр белән бәйле. Без Дәүләт автоинспекциясе җитәкчесе, транспорт һәм юл хуҗалыгы министры белән юл-транспорт һәлакәтләрен бете­рү­дә оперативрак булырга кирәклеге турында килештек. Башкала мэриясе, Транспорт һәм юл хуҗалыгы министрлыгы һәм ЮХХДИның тырышлыкларын берләш­тер­гәндә хәлне нор­мальләш­терү мөмкин. Минемчә, хәрәкәтнең акрынлашуы гадәти трафикның 10-15 процентына гына рөхсәт ителә ала. Кешеләрнең хәрәкәт итү вакыты һич тә икеләтә артырга тиеш түгел”, — дип ассызыклады Премьер-министр.

Кайбер урыннарда җылылык бирү сезоны башланмаган булса да, сентябрь квитанция­ләрендә җылылык өчен исәпләр куелып килгән. “Бу нормативлар буенча түләүче йортларга кагыла. Исегезгә төшерәбез, төбәк регламенты буенча, җылыту бирелү-бирелмәүгә карамастан, елына 8 ай норматив буенча түлибез. Монда юридик хокук бозулар юк. Әгәр сентябрьдә исәпләр куелса һәм җылылык бирелмәсә, бу закон бозу түгел. Димәк, май аенда җылылык буламы-юкмы, халыкка исәпләр килмәячәк”, — дип аңлатты моны Елена Прочаковская.

Башкортстанда 2017 елның 1 гыйнварына кадәр авария хәлендә дип танылган торактан гражданнарны күчерү буенча федераль максатлы программаның дүртенче этабы тәмамлана. 11 муниципалитетта яшәүчеләр яңа торак алган да инде. Программа әлегә Яңавылда гына тормышка ашырылмаган, дип хәбәр итте төзелеш һәм архитектура министры вазыйфасын башкаручы Владислав Сидоркин.
Республикада авария хәлендәге торактан күчерү буенча яңа программаны эшләтеп җибәрү планлаштырыла.

Фото: башинформ