Ике йөздән артык кешене югалттык...

Башкортстан буенча Гадәттән тыш хәлләр министрлыгының матбугат хезмәте мәгълүматлары буенча, узган җомга һәм ял көннәрендә янгыннарда җиде кеше һәлак булган. Янгыннарның сәбәпләрен хәзер Русия Гадәттән тыш хәлләр министрлыгы тикшерүчеләре билгели. Беренчел версия буенча, төп сәбәпләрнең берсе – ут белән саксыз эш итү.

“Янгын хәбәрчеләре булмаган, яисә булса да, батареяләре юк. Бүлмәдә тәмәке тарту яки ризык әзерләнгән электр приборларын калдыру. Мичләрне һәм төнгә калдырылган җылыткычларны сүндермәү. Боларның барысына да алкоголь куллану өстәлгән. Менә нәтиҗә”, – дип билгеләп үттеләр ведомствода.

Тагын бер үлемгә китерүче янгын Авыргазы районының Кешәнне авылында 13 ноябрь иртәсендә теркәлә. Русия Гадәттән тыш хәлләр министрлыгы янгын сүндерүчеләре бүрәнә йортта янгынны сүндерә. Түбә җимерелә. Конструкцияләрне сүткәндә 1957 елда туган ир мәете табыла. Күршеләре әйтүенчә, йортта билгеле бер яшәү урыны булмаган кеше көн күргән.

Уфа районының Михайловка авылында Ленин урамындагы күпфатирлы йортта янгын чыккан.

Русия Гадәттән тыш хәлләр министрлыгының матбугат хезмәте хәбәр итүенчә, утны сүндерүгә 16 хезмәткәр һәм 5 берәмлек техника җәлеп ителгән. 35 минут эчендә янгын локальләштерелгән. Кызганычка каршы, янгын вакытында ике һәлак булучы табылган, биш кеше мөстәкыйль эвакуацияләнгән.
Арытаба ачыклануынча, 10 квадрат метрда фатир янган.

Резида ВӘЛИТОВА.

Фото: МЧС Росии по Республике Башкортстан.