+21 °С
Болытлы
Җәмгыять
1 февраль 2024, 13:51
Мошенниклар гипнозыннан вакытында айнып киткән
Ишембайда яшәүче 30 яшьлек хатын-кыз аферистлар күрсәтмәсе буенча миллион сумга якын кредит алган, әмма акча күчерергә сорагач, аны алдаганнарын аңлаган.
Мошенниклар гипнозыннан вакытында айнып киткән
Русия Эчке эшләр министрлыгының Ишембай районы бүлегенә 30 яшьлек хатын-кыз алдау турында хәбәр белән мөрәҗәгать иткән. Аның сүзләренчә, ул шунда ук аферистлар белән аралашканын аңлаган, әмма кредитны барыбер рәсмиләштергән.
Мошенниклар хатын-кыз белән бер сәгатьтән артык аралаша. Башта банк хезмәткәре шалтыратып, аның исеменә кредит алу турында хәбәр итә. Шалтыратучы бу мәгълүматны кушымтада тикшерергә тәкъдим итә. Анда чыннан да хупланган кредит суммасы булган графа була. Аферистларга ышанып, хатын-кыз гаризаны үзе тутырып, кредит акчасы ала. Мошенниклар аннан яңа банк счеты булдыруны һәм акчаны шунда күчерүне сорагач, зыян күрүче үзен алдарга җыенуларын сизенә башлый.
Икенче көнне хатын-кыз банкка барып, булган хәлне ачыклый. Кредит учреждениесе хезмәткәре аңа кредитны вакытыннан алда ябарга ярдәм итә һәм полициягә мөрәҗәгать итәргә киңәш бирә.
Мошенниклык факты буенча җинаять эше кузгатыла.
