Юл һәлакәте нәтиҗәсендә 17 яшьлек кыз медицина учреждениесендә вафат була. Ике җәяүле, 20 яшьлек егет һәм коляскада утырган дүрт айлык бала, шулай ук мотоцикл йөртүче дәваханәгә китерелгән.
Прокуратура үлемгә китергән юл-транспорт һәлакәте факты буенча тикшерү оештырган. Күзәтчелек ведомствосының матбугат хезмәтеннән хәбәр итүләренчә, авария төнге сәгать уникенчедә булган. 16 яшьлек мотоцикл йөртүче Дарьино авылында 4 айлык бала белән юл кырыеннан барган ике җәяүлене бәрдергән.
“Прокуратура балигъ булмаганнар турындагы законнарның үтәлешен тикшерәчәк, ата-аналарның үз вазыйфаларын тиешенчә үтәвенә бәя бирәчәк”, – дип ассызыкладылар ведомствода.
Башкаланың Октябрь проспектындагы 164нче йорт каршында “Шкода Октавиа” руле артындагы 21 яшьлек водитель, Трамвай урамына таба хәрәкәт иткәндә каршыга килүче “Хундай Туксон”га бәрелгән. Авария нәтиҗәсендә “Шкода” водителе, башы җәрәхәтләнеп, дәваханәгә мөрәҗәгать иткән. Медицина ярдәме күрсәткәч, аны өенә кайтарып җибәргәннәр. “Шкода” водителе сүзләренчә, авариягә аның машинасының техник төзексезлеге сәбәпче булган. Юл-транспорт вакыйгасы буенча административ тикшерү башлаганнар.
Уфада Коммунарлар урамындагы
67нче йорт каршында 23 яшьлек машина йөртүче “Киа Спектра” руле артында, “ВАЗ” автоүзәге тукталышы янында артка хәрәкәт иткәндә 65 яшьлек хатын-кызны бәрдергән.
Һәлакәт нәтиҗәсендә зыян күрүче төрле җәрәхәтләр белән дәваханәгә мөрәҗәгать иткән. Табиблар аңа барлык кирәкле ярдәмне күрсәткән һәм өенә кайтарып җибәргән.
Юл-транспорт һәлакәте факты буенча административ тикшерү башланды, дип хәбәр иттеләр башкала Дәүләт автоинспекциясе матбугат хезмәтендә.