Гомерен ике сарык хакына сатканнар

Татарстанда билгеле журналист, шагыйрә Гөлинә Шәйхинең әтисе югалган. Ул, телефонын да алмыйча, "Әлмәткә эшкә киттем" дигән язу калдырып, өйдән чыгып китеп югалган.

Рафаэль Шәйхетдиновка 55 яшь, аның инде 5-6 ел өлешчә хәтере юк. Соңгы 10 елны хәтерләми. Илдә ниләр булганын да белми, әйткән сүзен дә 5-10 минуттан оныта да кабатлап сорый икән.

Менә шундый авыру кешене берәү, арадаш аша, ике сарык бәрабәренә фермага коллыкка илтеп биргән. Бу хакта Гөлинә үзе социаль челтәрдә болай дип хәбәр итә:

«Әтине Әлмәтнең Васильевка дигән авылында урнашкан ферма абзарында таптык. Бер кеше кушуы буенча икенчесе аны шунда эшләргә алып барып тапшырган. 5 көн әти шушында яшәгән. Әтинең гомерен ике сарыкка сатканнар!»

Ул әтисе белән машинада сөйләшеп кайтуларын да яздырып барган.
- Үлеп калырмын дигән идем шунда.
- Нишләп алай уйладың?
- Таба алмаслар, сез - кызларымны да, Бөрбашны да күрә алмам, дигән идем. Кайлардан эзләп таптың, кызым? Ничә чакрым бу җир Бөрбаштан?
- Әлмәтнең бер авылы, әти.
- Кайда-а-а? Шакшы. Кеше гомерен ике сарыкка сатып киткән бит ул кабахәт. Ярый таптыгыз, кызым...

Кызы әтисенә карата мондый явызлык кылган бәндәләрне җәзага тарттырмакчы. "Якыннары өчен бугазыгызга ябышырга әзер булган Гөлинәне уяттыгыз», – дип язган ул сторисларында.