Мошенниклар остарганнан-остара

Башкортстан буенча Эчке эшләр министрлыгы матбугат хезмәтендә хәбәр итүләренчә, узган атна ахырында Нагаево авылында яшәүче 56 яшьлек кеше мессенджерда хәбәр алган. Уведомлениедә аның элекке компаниясендә мәгълүмати хәвефсезлек мәсьәләләре буенча ФСБ хезмәткәрләре тарафыннан тикшерү бара диелгән. Ир шундук бу конторада бүтән эшләмим, дип җавап биргән, әмма элекке хезмәткәрләр дә тикшерелә, дигән җавап алган. Шул ук көнне аңа үзен ФСБ хезмәткәре дип таныштырган аферист шалтырата. Ялган хокук саклаучы раслаганча, компания хезмәткәрләренең берсе аның шәхси мәгълүматларын эзләүдә булган кеше счетына акча күчерү омтылышы өчен файдаланган. Аннары ул ир-атка басым ясавын дәвам иткән, мошенниклык гамәлләрен булдырмау өчен ир-атка аның эшен махсус контрольгә алачак «коллегасы» белән ашыгыч рәвештә элемтәгә керергә кирәк, дигән.

Мошенник ир-атның телефонында шикле элемтәләр бармы дип кызыксынган. Акчасы өчен куркып калган уфалы аңа телефоныннан таныш булмаган номерлар җибәргән. Аферист алардан берничәсен сайлап алган һәм, аларны санап чыгып, аның счетыннан янәсе нәкъ менә шушы затлар тарафыннан акча урлау омтылышы бара, дигән. Аннары аңа «икенче ФСБ тикшерүчесе» шалтыраткан, ул ир-ат счетыннан акча күчерүне булдырмау өчен 4 миллион сум алырга һәм аларны Үзәк банк тарафыннан булдырылган махсус имин счетка урнаштырырга кирәк, дип аңлаткан.

Үзенең мобиль банкын тикшергәч, ир-ат чыннан да аңа 4 миллион сумлык кредит хупланганын ачыклаган, гәрчә ул үзе гариза бирмәгән булса да. Паникага бирелеп, ул банк бүлегенә юнәлә, кредит рәсмиләштерә һәм акчаларын ала. Мошенникларның күрсәтмәләрен үтәп, ул банкоматлар аша мошенникларга 3,8 миллион сумга якын акча күчергән, ә аннары үзенең хәйләкәр афера корбаны булуын аңлаган.

"Хокук саклау органнары хезмәткәрләре һәм фирмалардан мәгълүмат тарату схемасы - мошенниклыкның иң киң таралган ысулларының берсе. Көн саен республика халкына янәсе хокук саклау органнары хезмәткәрләреннән шалтыратулар килә, алар аферистларга бөтен акчаларын күчерергә ышандыра. Әгәр дә сез мондый шалтыратуны алсагыз, исегездә тотыгыз, Үзәк банкның, хокук саклау органнарының һәм рәсми учреждениеләрнең чын хезмәткәрләре беркайчан да гражданнарга шалтыратмыйлар һәм үз акчаларын махсус счетларга күчерүне сорамыйлар. Трубканы һичшиксез куегыз һәм якындагы полиция бүлегенә барыгыз", — дип хәбәр иттеләр Башкортстан буенча Эчке эшләр министрлыгы матбугат хезмәтендә.

Автор фотосы