Тукталыш яктырды!

Узган ел ахырында Республикага идарә итү үзәге теркәгән мөрәҗәгатьләрдә, һәрвакыттагыча, юллар торышына, төзекләндерүгә һәм торак-коммуналь хуҗалык проблемаларына зарланулар күп булган.

Менә берничә хәл ителгән мөрәҗәгать. Благовещенда Чапаев урамындагы коены япканнар. Бу хәл турында сигнал урындагы кешедән килгән: ул юлда ачык коены күргән. Башкортстанга идарә итү үзәгенең һәм район хакимиятенең оператив эш итүе нәтиҗәсендә куркыныч янаган кое тиз арада ябылган.

Стәрлетамак районының Мариинский авылында Лазурная урамы, 17 адресы буенча эскәмияләр тәртипкә ките­рел­гән. Бу хакта урындагы халык сораган булган.
Авыргазы районының Яңа Тимошкино авылында контейнер мәйданчыгының түбәсен ремонтлаганнар. Аны җил кубару турында бер кеше социаль челтәрләрдә язган. Хәбәрне Башкортстанның ЦУР роботы тоткан. Мөрә­җәгатьне Авыргазы районы һәм Исмәгыйль авыл советы хакимиятләре эшкә алган. Икенче көнне үк контейнер мәйданчыгының түбәсен беркеткәннәр. Шәрехләрдә әлеге кеше проблеманы оператив хәл итүләре өчен барысына да рәхмәт белдергән.

Уфада халык мөрәҗә­гатеннән соң Правда урамы, 10а адресы буенча тирәк­ләрнең очларын кискәннәр. Октябрь ахырында социаль челтәрләрдә бер кеше Дим районы хакимияте җитәкчесе посты астында йорт тәрәзәсе янындагы агачлар фатирга яктылык төшүне каплый, дип зарланган. Район хакимияте әлеге мөрәҗәгатьне эшкә алган. Агачларның торышын бәяләү өчен тиешле инспек­циягә хат юллаганнар. Хуплау алгач, белгечләр проблеманы хәл иткән.

Шушы урамда тукталыш павильонына яктырткыч куел­ган. Балалар поликлиникасы янындагы “Орион” тукталышында кичләрен караңгы булуы турында социаль челтәр­ләрдә шушында яшәүче кеше язган. Уфаның Дим районы хакимияте мөрәҗәгатьне эшкә алган. Халыкка уңайлы булсын өчен район хезмәтләре тукталыш павильонына яктырткычлар урнаштырган. Яктырту мәсьәләсе турында балалар поликлиникасы җитәк­челеге белән дә сөйләшкәннәр – хәзер аның күтәрмәсендә дә кичке вакытта ут яна.

Ә Стәрлетамакның Магистраль урамында яшәүче ши­каятеннән соң тукталыш павильонына яңа пыяла куйганнар. Стәрлетамак шәһәренең Торак-коммуналь идарәсе белгечләре бу хакта сигнал алгач та эшне башкарган.

Нефтекамада Сәнәгать һәм Индустриаль урамнары чатында светофорны ремонтлаганнар. Аның төзексезлеге турында бер кеше социаль челтәрләрдә хәбәр иткән бул­ган.
Мәләвез районында Дәү­ләткол һәм Сухаревка авыллары арасындагы юл ремонтланган. Быел яз машина юлының елга өстеннән үткән участогы түбәнәйгән. Бу хакта бер хатын социаль челтәр­ләрдә язган һәм юлны тәр­типкә китерүне сораган. Тиешле хезмәтләр аның өстенә ком-таш түшәгән.

Уфаның сәүдә комплекс­ларының берсенә кергәндә “Рәхим итегез” – “Добро пожаловать” вывескасындагы хатаны төзәтүне урындагы кеше сораган. Мәсьәләне башкаланың Совет районы хакимияте оператив хәл иткән. Эшкә Сәүдә, җәмәгать туклануы һәм хезмәт күрсәтүләрне координацияләү бүлеге бел­гечләре дә җәлеп ителгән.

Вывескаларда, юл күрсәт­кеч­ләрендә, урам, тукталыш исемнәрендә, башка урыс һәм башкорт телләрендәге язуларда хаталар турындагы мөрәҗәгатьләрне “Инцидент-менеджмент” вакыт-вакыт теркәп бара. Аларны төзәтү буенча эш системалы булсын өчен, төбәк Хөкүмәте Республикага идарә итү үзәгенә махсус чат-бот төзергә кушты. Ул “Хатасыз шәһәр. Башкортос­тан” дип атала. Аны түбән­дәге сылтама буенча табарга мөмкин: t.me/bashnamebot

Хата турында хәбәр итү өчен төгәл адресны күрсәтергә һәм мөмкин булганча фото беркетергә кирәк. Хәбәр автомат рәвештә “Инцидент-менеджмент” системасына элә­гәчәк, ә ЦУР инцидент карарын контрольдә тотачак.