Җил очырып алып киткән иде

Бер атнада Башкортстанга идарә итү үзәгенең мәгълүмат системалары 4548 мөрәҗәгать теркәгән. Узган атнадагы белән чагыштырганда, шәрехләр саны 530га арткан.

Мөрәҗәгатьләрнең күпче­ле­ге сәламәтлек саклау темасына кагыла ─– 786. Ташламалы дарулар белән тәэ­мин итү, медицина ярдә­менең тулы күләмдә күрсәтелмәве, табибка язылу проблемалары турында күп язганнар. Икенче урында юллар буенча мөрә­җәгатьләр –─ 667. Юлларны һәм тротуарларны боздан чис­тарту темасына мөрәҗә­гатьләр күп. Юлларны ремонтлау, төзү, чокырларны ямау проблемалары да көнүзәк.

Торак-коммуналь хуҗалык буенча хәбәрләр –─өченче урында. Бу хезмәтләр өчен түләүләр буенча сораулар саны арткан. Халыкны капремонт һәм торак-коммуналь хуҗалыкның барлык хезмәт­ләре буенча тарифларның артуы борчый.

Менә берничә хәл ителгән инцидент. Күмертауда төзек­ләндерү буенча ике инцидент эшләнгән. “Шахтостроительная” урамындагы 31а йорты янында фонарьның төзек булмавы турында 17 февральдә социаль челтәрләрдә бер хатын-кыз язган. Хәбәрне ЦУР­ның мәгълүмат системалары теркәгән. Шәһәр хакимияте белгечләре шәһәр хуҗалыгы бүлеге белән элем­тәгә кергән. 24 февральдә электр баганасындагы фонарь алыштырыл­ган.

Алексеевка авылы халкы социаль челтәрләрдә Яңа урам, 11, 13 адресы буенча утлар булмауга зарланган. Мөрәҗәгать­не Башкортстан ЦУРы роботы тоткан. Күмер­тау шәһәре хакимияте шәһәр хуҗалыгы бүлегендәге коллегаларына гариза юллаган. Белгечләр урынга барып, янган лампаларны алыштырган. Ә шәрехләрдә ханым проблеманы хәл иткән өчен барысына да рәхмәт белдергән.

Уфада Төхвәт Янәби урамындагы йортлар арасында “Җәяүлеләр кичүе” дигән юл билгеләре алыштырылган. Юлның бу участогында зур машиналар агымы булу һәм билге кирәклеге турында былтыр ноябрь ахырында Башкортстан Башлыгы Радий Хәбировның туры элемтәсе телеграм-ботына урындагы кеше язган. Уфа шәһәре хакимияте хезмәткәрләре хәбәр итүенчә, Төхвәт Янәби урамындагы 4нче һәм 49нчы йортлар арасындагы юлда –─ көйләнми торган, шулай ук 51нче йорт тирәсендә көй­ләнүче кичүләр бар һәм юл хәвефсезлеген арттыру өчен фотовидеотеркәү камерасы эшли. Бу урынны тикшергән­нән соң, яхшырак күренсен өчен “Җәяүлеләр кичүе” юл билгеләрен яшел фондагы яңаларына алыштырырга булганнар. “Ясалма корылмаларны ремонтлау һәм карап тоту буенча махсуслаштырылган идарә” хезмәт­кәр­ләре билгеләрне урнаштырган.

Туймазы шәһәрендә тимер юл астындагы тоннель тротуарына мәрмәр валчык сибелгән. Биредә тайгак һәм хәвефсез булмау турында халыкның шикаятен Башкортстан ЦУРы мәгълүмат системалары теркәгән. Шәһәр хакимияте мәсьәләне подрядчы оешма белгечләре белән хәл иткән.

Әбҗәлил районының Әс­кар авылында Төньяк бис­тәсендәге юл кардан чистартылган. Анда кар салу һәм коляска белән үтеп булмавы турында социаль челтәрләрдә бер хатын-кыз язган. Район хакимияте Әскар авыл Советы хезмәткәрләре белән элемтәгә кергән – икенче көнне бистәдәге юлны кардан чистартканнар.
Благовещенда Д. Бедный урамындагы трасса аша җәяүлеләр өчен җир өсте кичүен ремонтлаганнар. Аның өстеннән җил поликарбонат калаен очыруы турында урындагы кеше социаль челтәр­ләрдә язган. Благовещен районы хакимияте мөрәҗәгатьне эшкә алган. 18 февральдә Төзекләндерү һәм карап тоту идарәсе хезмәткәрләре җир өсте кичүендәге поликарбонат материалын яңага алыштырган.

Октябрьский шәһәренең Островский урамы, 51 адресы буенча яшәүченең социаль челтәрләрдәге хәбәреннән соң урам яктырткычын алыштырганнар.