Аферистларга дүрт миллион сумын күчергән

Стәрлетамак районында чираттагы эре мошенниклык очрагы теркәлгән. Җинаятьчеләр корбаны - 4 миллион сумнан артык акча югалткан 71 яшьлек ир.

Полициягә бирелгән мәгълүмат буенча, аферистлар пенсионер белән телефон аша элемтәгә кергән, үзләрен "Росфинмониторинг" һәм ФСБ хезмәткәрләре дип таныштырганнар. Җинаятьчеләр ниндидер затларның аның банк счетларына рөхсәтсез керү мөмкинлеге алуы турында хәбәр иткән.

Акча урлауны булдырмауда үз "ярдәмен" тәкъдим итеп, мошенниклар пенсионерны барлык булган акчаларын янәсе аның өчен махсус төзелгән "хәвефсез саклау счетына" күчерергә күндерә.

Ирне бу счетка керү мөмкинлеге анда гына булачак дип ышандырып, җинаятьчеләр аны төрле банк номерларына акча күчерергә җибәргәннәр. Берничә көн эчендә пенсионер өч   банкоматта булган һәм мошенникларга гомумән алганда 4 миллион сумнан артык акча күчергән.

Әлеге факт буенча "Мошенниклык" мәддәсе буенча җинаять эше кузгатылган. Полиция хезмәткәрләре җинаятькә катнашы булган кешеләрне ачыклауга һәм тоткарлауга юнәлтелгән оператив-тикшерү чаралары үткәрә.

Башкортстан буенча Эчке эшләр министрлыгы халыкка уяулык күрсәтүләрен һәм таныш булмаган кешеләрдән телефон аша килгән мәгълүматка тәнкыйди бәя бирүләрен сорап мөрәҗәгать итә, бигрәк тә акча һәм банк счетлары турында сүз барганда. Үзләрен кем итеп таныштырса да, билгесез затлар күрсәткән счетларга беркайчан да акча күчермәгез! Шикле шалтыратулар очрагында кичекмәстән үз банкыгызга һәм полициягә мөрәҗәгать итегез.

Автор фотосы.