Авыр техника үтә алмый иде

Узган атнада Республикага идарә итү үзәге халыктан килгән мөрәҗәгатьләр белән эшне дәвам итте.

Менә берничә хәл ителгән инцидент. Бу мәсьәләнең хәл ителүен Благовещен районының Варьяз авылы халкы да, район хакимияте һәм ЦУР хезмәткәрләре дә көткән. Монда юлны ремонтлаганнар: ул Яр буе урамын авылның калган өлеше белән тоташтырган.

Проблема турында урындагы халык язган. 2022 елның 23 мартында алар социаль челтәрләрдә Варьяз авылында Яр буе урамы буенча юлны чистартмыйлар һәм ашыгыч хезмәтләр монда үтә алмый, дип хәбәр иткән. Благовещен районы хакимияте хәбәрне контрольгә алган. Ачыклануынча, Яр буе урамына юл дамба аша уза, ә аннан юлларны чистарту өчен авыр техника үтә алмый икән. Юлның торышын авыл Советы белгечләре күзәтеп тора, чөнки язгы чорда туфракны кар сулары юа.

Урынга Благовещен районы хакимиятенең Төзекләндерү һәм торак-коммуналь хуҗалык бүлеге белгечләре килеп, чокыр аша юл участогын ремонтларга кирәк дигән карар кабул иткән. Смета төзегәннәр, финанслауны көткәннәр, подрядчы хезмәтне билгеләгәннәр һәм былтыр җәй эшкә керешкәннәр. Быел 11 сентябрьдә барлык эшләр төгәлләнгән.
Благовещен шәһәрендә исә Седов һәм Комаров урамнары киселешендә өстәмә урам яктырткыч урнаштырылган. Җәяүлеләр кичүендә кешеләрне күреп булмавы турындагы хәбәрне Башкортстан Башлыгы Радий Хәбировның “Туры элемтә”сенә былтыр декабрьдә юллаганнар. Мөрәҗәгатьне Башкортстанга идарә итү үзәге хезмәткәрләре теркәгән. Благовещен районы хакимияте инцидентны контрольгә алган һәм аны урам яктырту челтәрләрен карап-тоту буенча подрядчы оешмага – “Водоканал”га тапшырган. Белгечләр урынга барып, участокны тикшергән һәм җәяүлеләр кичүен яктырту өчен өстәмә электр баганасы куярга тәкъдим иткән. 11 сентябрьдә мәсьәлә хәл ителгән – хәзер Седов һәм Комаров урамнары киселешендә якты һәм хәвефсез.

Иглин районы үзәгендә Төзүчеләр урамында тротуарны төзекләндерергә кирәклеге турында шушында яшәүчеләр узган елның 9 декабрендә Башкортстан Башлыгы Радий Хәбировның “Туры элемтә”сенә язган һәм чара күрүне сораган. Социаль челтәрләрдә комментарийны Башкортстанның “Инцидент-менеджмент” мәгълүмат системасы теркәгән. Район хакимиятеннән хәбәр итүләренчә, Төзүчеләр урамындагы тротуарны төзекләндерү быел җәйгә планлаштырылган. 2025-27 елларга Иглин районының транспорт инфраструктурасын комплекслы үстерү программасы кысаларында, быел июльдә “Комстрой” җәмгыяте подрядчы оешма белән контракт төзегән һәм эшкә керешкән. Август ахырында белгечләр Төзүчеләр урамындагы тротуарны төзекләндерү эшләрен тәмамлаган.

“Бу инцидентны без Бүздәк районы хакимиятендәге хезмәттәшләребез белән бергә эшләдек. 24 августта бер ханым социаль челтәрләрдә Теләкәй-Кобау авылының Чишмә урамында янып чыккан фонарь турында язган иде. Башкортстан ЦУРы системасы хәбәрне теркәде. Кәпәй-Кобау авыл Советы белгечләре мәсьәләне хәл итте: урамда фонарь кабынды”, – дип язалар Республикага идарә итү үзәгеннән.

Ә бу хәбәр “Дәүләт хезмәтләре. Бергә хәл итәбез” кире элемтә платформасына килгән. Уфада Затон бистәсендә яшәүчеләр “Волна” паркындагы балалар мәйданчыгындагы эскәмияне ремонтлауны сораган. Ленин районы хакимияте хезмәткәрләре “Горзеленхоз” белән элемтәгә кергән һәм мөрәҗәгатьне эшкә тапшырган. Проблема хәл ителгән.
Калтасы районының Краснохолм авылында Ленин урамындагы 31нче йортта канализация торбасын алмаштырганнар. Икенче подъездда аннан су агып чыгуы һәм йортны дым басуы турындагы хәбәрне 19 августта юллаганнар. Район хакимиятеннән хәбәр итүләренчә, әлеге адрес буенча “УЖХ” белгечләре чыккан. Алар канализация системасын чистарткан һәм торбаларны алмаштырырга кирәк дигән карарга килгән. 15 сентябрьдә барлык эшләр төгәлләнгән.