Утынны китереп, ярып өйгәннәр

Икенче атна инде Башкортстанда яшәүчеләрне торак-коммуналь хуҗалык темасы аеруча борчый һәм кергән мөрәҗәгатьләр арасында беренче урынны алып тора – 1719. Бу, үткән атнадагыга караганда, 165 хәбәргә күбрәк. Халык җылылык бирүне сорый, аның тиешенчә булмавына зарлана, салкын яисә кайнар су булмау һәм су белән тәэмин итү системасында аварияләр турында яза. Республикада яшәүчеләр, шулай ук, торак-коммуналь хезмәтләр өчен түләүгә һәм идарәче компанияләрнең эшеннән канәгатьсезлек белдереп, мөрәҗәгатьләр юллаган. Иң күп хәбәрләр Уфадан, Салаваттан һәм Белорет районыннан килгән.

Юллар темасы икенче урында ─– барлыгы 1328 мөрә­җәгать. Юлларны ремонтлау, яктырту, чокырларны ямау, тротуарларны төзек­ләндерү һәм грунт юлларны карап-тоту темаларына хәбәрләр теркәл­гән. Өченче урында төзек­ләндерү темасы ─– 1148.

Балтач районының Иске Балтач авылындагы Энергетиклар урамында аллея төзекләндерелгән. Бу үтенеч­не урындагы халык Балтач районы хакимияте сайтына 3 февральдә язган, мөрәҗә­гатьне Башкортстанга идарә итү үзәге хезмәткәрләре теркәгән.

Ачыклануынча, район хакимияте бу мәсьәләне 2022 елдан бирле контрольдә тот­кан һәм аллеяне төзек­ләндерү кирәклеген белгән. Финанслау чыганагын эзлә­гәннәр. 2023 елда район халкы белән бергә бу урам төзек­ләндерү объекты итеп сайланган һәм “Уңайлы шәһәр мохитен формалаштыру” федераль программасында катнашуга заявка бирелгән. Ел башында акча кергән һәм подрядчы хезмәтләр эшкә кереш­кән. Җәй ахырына Энергетиклар урамындагы аллея төзек­ләндерелгән.

27 сентябрьдә “Яшел Башкортстан” акциясе кысаларында район халкы да әлеге аллеяне төзекләндерүгә үз өлешен керткән һәм нарат, өрәңге, миләш, юкә һәм сирень үсентеләре утырткан.

Уфа янындагы Нагаево авылында яшәүче ханым кышка утын хәзерләргә ярдәм сорап мөрәҗәгать иткән. Аның ире һәм улы хәзер СВО зонасында, илебезне батырларча саклыйлар. Хәбәр Республикага идарә итү үзәгенең мәгълүмат системаларында теркәлгән һәм Уфаның Октябрь районы хакимиятенә тапшырылган. Утынны Нагаево авылының Төньяк урамы, 14 адресы буенча китергән­нәр. Ханымның үтенече буенча, аны ярып өйгәннәр. Ярдәмнәре өчен 33нче олимпия резервы спорт һәм тау чаңгысы мәктәп­ләре укучыларына рәхмәт белдерелгән. Бердәм команда, кайгыртучанлык күрсәтеп, хуҗабикәне кышка утын запасы белән тәэмин иткән.

Исегезгә төшерәбез: республикада СВОда катнашучыларга һәм аларның гаилә әгъзаларына ярдәм итүнең 50дән артык төбәк чарасы гамәлдә.

Уфа шәһәренең Калинин районында яшәүче уяу кеше социаль челтәрләрдә Наречная урамындагы юлның торышына игътибар итүне сораган. Аны тәртипкә китерергә кирәклеге турында ир 10 сентябрьдә хәбәр иткән. Калинин районы хакимияте бу участоктагы проблема турында белгән һәм ремонт планга кертелгән булган: төзелеш материаллары килүен һәм махсус техниканың бушавын көткәннәр. 17 сентябрьдә үтенеч канәгатьләндерелгән.

Шушы ук районда халык мөрәҗәгатеннән соң Вострецов урамындагы чокырларны да ремонтлаганнар. Проблема турында алар социаль чел­тәрләрдә быел майда язган. Юл хезмәтләре белгеч­ләре әлеге проблеманы хәл иткән.

Социаль челтәрдәге әлеге инцидент Туймазыда яшәүче хатын-кыздан килгән. Ул хәбәр итүенчә, Көньяк урамы, 10 адресы буенча йортны сүткәннәр һәм территориядә төзелеш чүп-чарлары калган. Хатын бу урынны җыештыруларын сораган. Туймазы районы хакимияте хезмәткәрләре төзүче оешма адресына чүп чыгаруны таләп итеп хат юллаган, мәсьәләне контрольдә тотканнар. Сентябрьдә проблема хәл ителгән.