Спорт мәйданчыгы ачылды!

Узган атнада Башкортстанга идарә итү үзәге мәгълүмат системалары 6767 хәбәр теркәгән. Шәрехләр саны, алдагы җиде көндәге белән чагыштырганда, 142гә арткан.

Юллар темасы беренче урында ─– барлыгы 1758 хәбәр. Күпчелеге чокырларны һәм юлларны ремонтлауга кагыла. Шулай ук, уку елы башлану һәм көн яктылыгы кимү сәбәпле, халык балаларның хәвефсезлеге өчен борчыла: тротуарларны төзекләндерүне һәм юл буйларын яктыртуны сорыйлар.

Торак-коммуналь хуҗалык темасы – икенче урында –─ 1265 хәбәр. Җылыту сыйфаты, су белән тәэмин итү челтәрлә­рендәге аварияләр нәтиҗәсен­дә кайнар яисә салкын су булмау буенча мөрә­җәгатьләр килү дәвам итә. Түбәдән су үтү буенча шә­рех­ләр саны арткан. Төзек­лән­дерү темасы өченче урында –─ 1036 хәбәр. Тротуарларда һәм җәмәгать киң­лекләрендә яктылык урнаштыруны сораучылар да күп.

Менә хәл ителгән берничә инцидент. Бакалы районының Яңа Катай авылында Тыныч­лык урамы буенча юлга ком-таш катнашмасы сибелгән. Аны тәртипкә китерүне халык сораган һәм бу хакта социаль челтәрләрдә язган булган. Республикага идарә итү үзәге белгечләре, хәбәрне теркәп, район хакимиятенә тапшырган. Муниципалитетта бу проблема турында белгәннәр һәм ремонт ясау өчен акча эзлә­гәннәр. Инцидент хәл ителгән: юлны Яңа Катай авыл биләмәсе исәбенә төзеклән­дергәннәр.

Иглин районында яшәүче кеше социаль челтәрләрдә Иглин авылының Ленин урамында район үзәк дәваханәсе каршындагы проблемалы юл участогы турында хәбәр иткән: анда яңгырдан соң су җыел­ган һәм күлләвекләр барлыкка килгән. Муниципалитет хакимияте хәбәрне эшкә алган. Октябрьдә белгечләр тротуар юлына асфальт валчыклары түшәгән.
Узган елда бер активист Күгәрчен районының Морак авылы халкы исеменнән республика Башлыгы Радий Хәбировның “Туры элемтәсе”­нә мөрәҗәгать итеп, Төньяк бистәсендәге паркта спорт мәйданчыгын төзекләндерүне сораган иде. Видеомөрәҗә­гать былтыр 29 ноябрьдә җибәрелгән. ЦУР белгечләре, аны теркәп, мәсьәләне хәл итүгә керешкән.

Ачыклануынча, Күгәрчен районы хакимияте авыл кешеләренең үтенече турында белгән: хәл итү юлларын һәм төзекләндерү өчен финанслар эзләгәннәр. 2023 елда район халкы белән бергә бу паркны төзекләндерү объекты итеп сайлаганнар һәм “Уңайлы шәһәр мохитен формалаштыру” федераль программасына тавыш бирергә заявка тапшырганнар. Акча кергәннән соң подрядчы оешма төзекләндерүгә керешкән. 10 октябрьдә Төньяк бистә­сендә тантаналы рәвештә спорт мәйданчыгы ачылган.

Бүген башкала халкы һәм кунаклары Агыйдел буенда урнашкан спорт мәйданчыгын­да шөгыльләнә алалар: бире­дә өзелеп төшкән бокс грушасын беркеткәннәр. Моны эшләү үтенечен игътибарлы уфалылар калдырган, ЦУР хезмәткәрләре теркәгән. Мәсь­әләне Киров районы хакимияте һәм профильле хезмәтләр хәл иткән. 15 октябрьдән спорт мәйданчыгы килүчеләрне кабул итәргә әзер.

Тагын бер мөрәҗәгать Мәләвез районында яшәүче­ләрдән килгән: социаль челтәрләрдә алар шәһәрнең Ленин урамындагы тукталышта павильон пыяласы ватылуы турында хәбәр иткән. Район ха­кимиятеннән белдерү­ләренчә, павильонны арендалаучы оешма проблеманы кыска вакыт эчендә хәл иткән, ә мөрәҗәгать итүче, җавап итеп, барысына да рәхмәт бел­дергән.

Уфа районының Миловка авылында Чижов проспекты буенча яңа тукталыш павильоны урнаштырылган. Аның кирәклеге турында социаль челтәрләрдә торак пункт халкы язган. Бу үтенечне Башкортстан ЦУРы роботы тоткан. Уфа районы хакимияте һәм юл хезмәте белгечләре проблеманы хәл иткән.

Башкаланың Сипайлово бистәсендә яшәүче хатын Максим Рыльский урамындагы йорт ихатасындагы мәй­данчыкның торышына игътибар итүне сораган. Биредә уен элементлары ватылуы турында социаль челтәрдә ул 2 октябрьдә язган. Октябрь районы хакимияте һәм ида­рәче компания белгечләре тырышлыгы белән 9 октябрьдә барлык эшләр тәмамланган: хәзер балалар мәйданчыгы хәвефсез һәм яңадан сабыйларны кабул итәргә әзер.