Иҗтимагый палата ─ иң таләпчән эксперт

Дәүләт җыелышы-Корылтай Рәисе Константин Толкачев  Башкортстанның Иҗтимагый палатасы әгъзалары белән очрашты, аның кысаларында үзара хезмәттәшлек турында килешү имзаланды. Очрашуны ачып, Константин Толкачев  күп еллар дәвамында урнашкан багланышларга югары бәя бирде. ─ Без Иҗтимагый палатаның иң таләпчән "тышкы эксперт" булуына күнеккәнбез. Бүген социаль әһәмияткә ия булган бер генә закон да сезнең игътибардан читтә калмый диярлек, ─ диде парламент Рәисе. ─ Иҗтимагый палатаның “түгәрәк өстәл”ләрдәге бәхәсләрдә, иҗтимагый мониторингларда туган башлангычлары еш кына законнарга әверелә. Сезнең идеяләрегез, эшләнмәләрегез, проблемаларны күрүегез республиканың күп кенә төп нормаларының нигезенә салынды. Бу, мөгаен, безнең партнерлыкның өлгергәнлегенең иң якты күрсәткечедер. Иҗтимагый палата эшчәнлегенең төп юнәлешләре һәм парламент белән хезмәттәшлек перспективалары турында палата рәисе Энҗе Әхмәдуллина чыгыш ясады. Ул бүген палата ─ кабинет структурасы түгел, ә иҗтимагый проблемаларны иртә стадиядә ачыкларга, гражданлык җәмгыятенең бердәм позициясен формалаштырырга һәм аны дәүләт власте органнарына, шул исәптән Дәүләт җыелышы-Корылтайга, җиткерергә мөмкинлек бирүче кире элемтә механизмы, диде. Очрашу барышында депутатлар, Иҗтимагый палата һәм Конституцион совет әгъзалары хакимият һәм җәмгыять багланышларына кагылышлы мәсьәләләр буенча фикер алыштылар. Алар арасында ─ закон чыгару эшчәнлегендә системалы хезмәттәшлек перспективалары, шул исәптән социаль әһәмиятле закон проектларына даими иҗтимагый экспертиза уздыру форматында.   Дәүләт җыелышы-Корылтай каршындагы Яшьләр иҗтимагый палатасы белән хезмәттәшлекне киңәйтү һәм яшь активистларны иҗтимагый әһәмиятле башлангычлар буенча фикер алышуга җәлеп итү темасы күтәрелде. Катнашучылар балалар иминлеге һәм балигъ булмаганнар арасында девиант тәртипне кисәтү мәсьәләләренә аерым игътибар бирде,  палата вәкилләрен профильле эшче төркемгә кертү турында карар кабул ителде. Шулай ук, эчтәлекле башлангычлар вакытында рәсмиләштерелә һәм билгеләнгән тәртиптә кертелә алсын өчен НКО вәкилләре өчен закон чыгару процедуралары нигезләренә өйрәтүне оештыру буенча тәкъдимнәр каралды. Моннан тыш, яклар республика Башлыгы игълан иткән “Зур һәм тату гаилә елы”нда гаилә кыйммәтләрен популярлаштыруга юнәлтелгән “Ата батырлыгы” конкурсына ярдәм итү турында фикер алышты. Һәр мәсьәләдә фикер алышу йомгаклары буенча килешүгә ирешелде һәм алдагы адымнар билгеләнде. Очрашу Дәүләт җыелышы-Корылтай һәм Башкортстан   Иҗтимагый палатасы арасында үзара хезмәттәшлек турында килешүгә кул кую белән тәмамланды.      

Иҗтимагый палата ─ иң таләпчән эксперт