“Начар гына түгел, коточкыч хәлдә”

Радий Хәбиров халыкара һәм бөтенрусия турнирларында уңыш­лар яулаган спортчыларга Салават Юлаев орденын тапшырды. Боксчы Артур Субханкулов, фехтование буенча Русия чемпионаты җиңү­челәре һәм призерлары Аделина Заһидуллина һәм Владислав Журавлев югары бүләккә ия булдылар. “Безнең Фехтование мәктәбе оешкан, нәтиҗәләр искиткеч. Бокстагы уңышлар өчен республика Хөкүмәте Премьер-министры Андрей Назаровка рәхмәт белдерәм, спортның бу төрендә дә җиңүләр яуланды. Республиканың Көрәш федерациясе президенты буларак, мин егетләребезнең дә чемпион булуы белән горурланам. Һәр җиңү артында спортны алга әйдәүче кеше тора”, – диде республика Башлыгы.

Олимпия чемпионы Аделина Заһидуллина төбәк җитәкчесенә Русия халыклары бердәмлеге елына багышланган “Башкортстан спорты турында” китабын тапшырды. “Без Сезгә спорт объектлары төзелеше, заманча Фехтование үзәге өчен рәхмәтлебез. Ул – илдә иң яхшы­ларның берсе. Анда күнегүләр үткәрү һәм тернәкләнү өчен барлык шартлар да бар. Без республика ярдәмен тоябыз”, – диде Аделина За­һидуллина.

Узган атнада “Сәламәтлек поездлары” табиблары республика районнарында онкологиягә шик­ булуның 24 очрагын, шикәр диабетына шик булуның 57 очрагын һәм кан әйләнеше системасының 334 авыруын ачыклаган. Бу хакта сәламәтлек саклау министры Айрат Рәхмәтуллин хәбәр итте. Ул белдерүенчә, табиблар 57 торак пунктта 19843 пациентны караган, белгечләр 4500дән артык рентген-тикшеренү үткәргән. Бу атнада “Сәламәтлек поездлары” мобиль бригадалары Благовещен, Дуван, Калтасы, Туймазы, Гафури һәм Белорет районнарына киләчәк.

Башкортстан Башлыгы Уфада Салават Юлаевка куелган һәйкәл­нең торышы турында сөйләде. Әле һәйкәл реставрациядә. “Ул начар гына түгел, коточкыч хәлдә, әгәр тагын күпмедер вакыт торса, җимерелер иде”, – дип ассызыклады Радий Хәбиров. Республика җитәкчесе һәйкәлне шәхсән үзе барып карады һәм анда дым һәм коррозиядән ярыклар күп булуын билгеләде. Аның сүзләренчә, һәйкәлне тергезү буенча күләмле эш башкарылырга тиеш. Салават Юлаевка һәйкәл реконструкциядән соң 2027 елның октябрендә кире урынына кайтарылачак.

Башкортстанда язгы кыр эшләре кызу бара. Республиканың барлык районнары аграрийлары сезонлы эшләргә кереште. Барлыгы 1,984 миллион гектар мәйданга чәчү планлаштырыла. Шулардан әлегә бөртекле сабан һәм кузаклы культуралар (бодай, солы, арпа, борчак) – 18 мең гектарга, майлы культуралар (көнбагыш, җитен һәм рапс) 6 мең гектарга чәчелгән. “Чәчү эшләрен Стәрлетамак һәм Мәләвез районнары хуҗалыклары актив алып бара”, – диде Хөкүмәт вице-премьеры, авыл хуҗалыгы министры Илшат Фазрахманов. Быел язгы кыр эшләрен башкару өчен 17,5 миллиард сумга якын кыска сроклы ташламалы кредитлар кирәк. Бүгенгә Русиянең Авыл хуҗалыгы министрлыгы тарафыннан 17,7 миллиард сумлык 359 заявка хупланган.

Радий Хәбиров Хөкүмәтнең беренче вице-премьеры Урал Кил­сенбаевның быел төбәктә мәк­тәпләрне капиталь ремонтлау программасын гамәлгә ашыру барышы турындагы чыгышын шәрехләде. “Әлеге программа белән эшләргә өйрәндек. Срокларны өзмибез, шул сәбәпле, безгә акча түлиләр”, – дип билгеләде ул һәм быелга планлаштырылган эшләрне вакытында башкарырга кушты. Урал Килсенбаев, күп кенә мәгариф учреж­дениеләрендә участок сайлау комиссияләре урнашу сәбәпле, эшләрне тәмамлау вакыты 1 сен­тябрьдән 1 августка күчерелде, дип белдерде.
Әйткәндәй, утырышта билге­ләнүенчә, быел укытучыларның август киңәшмәсе Ишембай районында узачак.