Уфада "Яшел Башкортстан" экофестивале уза

Үзенең 10 еллык юбилеен билгеләп үтүче «Яшел Башкортстан» төбәк иҗтимагый оешмасы зур экофестиваль үткәрә. Чара кысаларында «Яшел бум – агачка тормыш бүләк ит» макулатура җыю акциясе уза. Бирегә иске гәзитләр, журналлар, картон һәм офис кәгазе алып килергә мөмкин.

Программада спилс-карталар буенча гаилә чемпионаты, вакытка уникаль интеллектуаль җыю уены каралган. «Яшел Башкортстан» картасын бөтен гаилә белән башкаларга караганда тизрәк җыеп карарга була. Бу күңелле вакыт үткәрү һәм үз команда эшеңне тикшерү өчен менә дигән ысул.

Шулай ук эшкәртү өчен дарулар җыю игълан ителде – пунктка дарулар, капсулалар, гранулалар, порошоклар, мазьлар, ампулалар китерергә мөмкин.

"Безнең барлык акцияләребез оешманың 10 еллыгына багышланган. Ун еллык юбилеебыз - ул дата гына түгел, ә уртак максат өчен меңләгән кешеләрнең көчләрен берләштерү өчен сәбәп. Шушы вакыт эчендә без республиканың табигатен саклауга зур өлеш керттек! Без экологиянең глобаль проектлардан түгел, ә гади көндәлек гамәлләрдән: макулатура тапшырудан, даруны дөрес утильләштерүдән яки бер агач утыртудан башлануын күрсәтергә телибез. Бүген экофестивальдә «10 000 яхшы орлык» юбилей акциясе кысаларында үзләренең зәңгәр чыршыларын утырткан 1500нән артык катнашучы теркәлгән инде. Спилс-карталар буенча гаилә чемпионатына 15тән артык гаилә җыелды. Балаларның әти-әниләренә Башкортстанның кайсы районы һәм шәһәре кайда икәнен әйтеп торуларын күрү бик күңелле. Бу фестиваль - республиканың яшел киләчәгенә уртак өлешебез», - ди «Яшел Башкортстан» оешмасы рәисе Гөлнара Хәмиева.

Фестиваль 20 сентябрь ахырына кадәр дәвам итә. Акциядә катнашучыларны рәхмәт хатлары һәм бүләкләр көтә.

Фото: Зарина Закарина.