Барлык яңалыклар
Мәгариф
9 октябрь 2014, 03:00

Дәүләт игътибары яңа җиңүләргә дәртләндерә!

Медицина колледжларында укучыларга тармак җитәкчесе премияләре тапшырылды.Медицина колледжлары талибларына Башкорт­станның сәламәтлек саклау министры премиясен тап­шыру күркәм тради­циягә әйләнеп бара. Быел да бу чара Уфа медицина колледжында уку алдынгылары слеты кысаларында тантаналы шартларда үтте. Баш­кортстанның төрле төбәкләрендәге медицина колледжларында укучы 22 кеше мәртәбәле премиягә лаек булды.

Республиканың сигез медицина колледжында бүген 6 меңнән артык кеше белем ала. Аларның 136сы тик яхшы билгеләренә генә укый. Арада Русия күләмендәге конкурсларда катнашып, җиңү яулаучылар да бар.
— Сәламәтлек саклау системасының үсеше тармак­ның төп ресурсын тәшкил итүче медицина һәм фармацевтика кадрларының әзерлек сый­фатына һәм аларның һөнәри дәрәҗәсенә бәйле, — диде сәламәтлек саклау министры Әнвәр Бакиров. — Респуб­ликада югары һәм урта медицина һәм фармацевтика белеменә ия хезмәткәрләргә ихтыяҗ зур булуын исәпкә алып, аларны әзерләүгә игътибар елдан-ел арта. Урта медицина пер­соналының белемен камил­ләштерү буенча күп­баскычлы әзерлек системасы булдырылган. Медицина колледжлары ел саен 1500 белгеч әзерләп чыгара.
Министр кулыннан премия алучылар арасында Уфа медицина колледжыннан Рита Мирсаяпова, Туймазы һәм Бөре колледжларыннан Лилия Минһаҗева белән Илфат Йосыпов та бар иде. Илфат — чыгарылыш курс талибы. Тумышы белән Караидел районы егете. Колледжда теорияне үз­ләштереп, “Ашыгыч ярдәм” хезмәтендә практика үткәндә хәлиткеч вакытта Илфат югалып калмый. Инсульт кичергән авыруның хәлен тиз арада аңлап өлгерә һәм тәүге секундларда ук ярдәмгә килә. Беренче ярдәмне югары профессиональ дәрәҗәдә күрсәтә һәм кешенең гомерен саклап кала.
Медицина колледжлары тармакка дәвалау, акушерлык, фармацевтика, лаборатор диагностика, массаж буенча белгеч кадрлар һәм шәфкать туташлары әзерли. Колледжларда белем бирү системасы заманча технологияләргә корылган. Уку йортлары профессионаллардан торган педагоглар коллективы белән тәэмин ителгән. Яхшы матди-техник база һәм инновацион тех­нологияләр заманча белем бирергә ярдәм итә. Бүгенге көндә һәр колледжда практика үтү өчен махсус үзәкләр оештырылган. Алар электрон тренажерлар, IТ-технологияләр, Wi-Fi зоналар белән җиһаз­ландырылган һәм электрон китапханәләр белән тәэмин ителә. Мәртәбәле премиянең талибларга укуда тагын да зуррак уңышларга ирешергә ярдәм итәчәгенә шик юк.