-14 °С
Болытлы
Гәзиткә язылуVKOKTelegramЯRus
Барлык яңалыклар
Мәгариф
5 февраль 2015, 21:45

“Гомеремнең көзе килде, кәрзиннәре нык тулып…”

Күптән түгел район үзәкләштерелгән китапханәсендә РСФСРның халык мәгарифе отличнигы, хезмәт ветераны, каләм иясе Фәнә Минһаҗеваның “Яратам сине, тормыш!” дигән китабының исем туе үтте. Автор китапның шулай аталуын менә ничек аңлатты: “2013 елда ветераннар советы конкурс игълан иткән иде. “Яратам сине, тормыш!” дигән шигыремне яздым һәм ул миңа бик ошады. Соңгы елларда язган шигырьләремне туплагач, китабыма шул исемнең килешле булуын аңладым. Гомеремнең көзе килде, кәрзиннәре нык тулып. Бу тормыштан күпне алдым, яшим канәгать булып”.

Әйе, ул чын мәгънә­сендә тормышны ярата: дөнь­яны, туган җире табигатен, уңган кешеләрен мактап, аларга дан җырлый. Башкаларны сокландырырлык шигъри моңны, уйлата да, елата да алырлык хис ташкынын каян алган соң Фәнә Әнвәр кызы?
Татар Мәнәвезе авылында туып-үскән Фәнә кечкенәдән әнисе Зиһеннурның моңлы җырларын, әтисе Әнвәрнең кичләрен сыздырып тальянда уйнавын ишетеп үсә. Сугыш чорында кичергән кайгы-хәсрәтләре, әтисенең яу кырында һәлак булуы аның сизгер йөрәгенә бетмәс-төкәнмәс сагыш сала. Мәктәп елларында да, БДУның филология факультетында белем алганда да, Илешкә кайтып, өч дистә елдан артык 2нче Югары Яркәй урта мәктәбендә татар теле һәм әдәбиятыннан укытканда да сәнгать дөнья­сыннан аерылмый ул. Фәнә Минһаҗева­ның соңгы елларда шигъри сәләте дә ачыла бара. Ул, ак кәгазь битенә энҗе юллар тезеп, үзен борчыган сорауларга җавап эзли, аның кешеләргә әйтер сүзе бар. Район гәзите “Маяк”та басылган эч­тәлекле мәкаләләр, уйландыра торган шигырьләр авторы 2014 елда гәзитнең “Ел лауреаты” булды.
Туган авылына мөкиббән гашыйк булып, хисле шигырь­ләр иҗат итүчене авылдашлары бик тә хөрмәт итә икән. Без, “Балкыш” әдәби берләшмәсе әгъзалары, аның үткән язда туган авылы клубында үткән иҗат кичәсендә катнашып, моңа шаһит булган идек. Бу юлы да шулай булды. Авылдашлары Илмира Ахунова, Дилә Зиннәтуллина аның сүзләренә язылган җырларны оста итеп башкарсалар, Базытамак урта мәк­тәбенең бер төркем укучылары тамашачыларны Фәнә апаның шигырь­ләрен сәнгатьле укулары белән сокландырды. Аның сүзләренә Мөфтәдин Гыйлә­җев, Мирзанур Хираҗев моңлы, матур көйләр язган. Аларны сигезенче дистәсен үтеп киткән булса да, яшьләргә биргесез Фәнә апаның үзенең дә аһәңле итеп башкаруы, “Яшьлегемә кайтып” дигән җырлы-биюле сәхнә күре­нешен тәкъдим итеп, очып биеп йөрүе тыңлаучыларны таң калдырды.
Фәнә Минһаҗева шигырь­ләрендә 42 ел бергә гомер кичер­гән кадерле тормыш иптәшенә (хәзер мәрхүм инде), иркәләп үстереп олы тормыш юлына чыгарган балаларына, оныкларына карата изге теләк-хисләре, аларны яратуы кызыл сызык булып үтә. Бәйрәмдә катнашкан килене Зинфира, туганнары Айдар Минһаҗев белән Зүлә Мөхәм­мәтшина якын кешеләрен котлап, аңа иҗат уңышлары, сәламәтлек теләделәр. Кичәгә килгән күпсанлы кунаклар арасыннан күренекле шагыйрь Муса Сираҗи, Башкортстан Язучылар берлегеннән күп сәламнәр алып килгән Лира Яхшыбаева, Дүртөйледән шагыйрь Рафаил Хафизов, журналист Гөлфинә Сәли­мова автор шигъриятенең халыкчанлыгын, фикерен йөрәк хис­ләренә төреп бирә белүен ассы­зык­лап үттеләр. Район үзәкләш­терелгән китапханә директоры Фина Зиннәтуллина аңа иҗат биеклекләре теләп, истәлекле китаплар, Яркәй авыл Советы башлыгы урынбасары Алсу Мослыхова Рәхмәт хатын тапшырды. Кичә барышында күрсәтелгән виртуаль күргәзмәне әзерләүдә, сценарий төзүдә күп көч салган китапханәнең хез­мәтләндерү бүлегенең әйдәүче китап­ханәчесе Клара Хәлиуллина аны җанлы итеп алып барды.
Күп кенә шигырьләренең Илеш­кә багышлануы, район күләмендә үткән зур чараларда Ил-ана һәм Җир-ана образларын оста сынландыруы белән дә якташлары хөр­мәтенә лаек Фәнә апа. “Илһам” әдәби-музыкаль клубы Һәм “Балкыш” әдәби бер­ләшмәсе әгъзала­ры, үзенең элекке укучылары, район мәктәп­ләренең татар теле укытучылары, дуслары, күр­шеләре Финә Минһаҗеваны гөл-чәчәк­ләргә, алкышларга күмде. Бәй­рәмне музыкаль яктан Ришат Абдуллин, Фикус Сәе­тов бизәде, Флүзә Абдуллина, хезмәт ветераннары башкаруындагы җырлар күңелләргә хуш килде.

Зәлифә КАШАПОВА,
Башкортстанның һәм Русиянең Язучылар,
Журналистлар берлекләре әгъзасы,
“Балкыш” әдәби берләшмәсе җитәкчесе.
Читайте нас в