Укымышлы шәһәрдә яз

Китапханә программалары бәйгесе, шулай ук, республикадагы балалар китапханә­ләрен үзенә җәлеп итте.
Китап уку атналыгына бар­лыгы 5000 укучы бала җә­леп ителде. Алар 100 меңләп китап укыды. Шушы вакыт эчендә республика күләмендә барлыгы 300 чара үткәрелде, анда 11 мең кеше катнашты.
2 апрельдә, Халыкара балалар китабы көнендә, Уфа “Нур” татар дәүләт театрында “Уфа — балалар китабы атналыгы башкаласы” дигән бәйрәм-фестиваль узды. Анда Уфа шәһәре һәм республикадагы балалар китап­ханә­ләре хезмәткәрләре һәм китап сөючеләр катнашты. Аларны биредә Китап патша­бикәсе, әдәби геройлар, әкият мәй­данчыклары, күңел­ле бәйге­ләр, уеннар, сюрпризлар һәм бәйрәмчә кәеф көтеп тора иде. Фестивальдә балалар китабы атналыгында җиңү­челәр билгеләнде.
Ш. Ходайбирдин исе­мендәге Үзәк шәһәр балалар китапханәсе иң яхшы балалар китапханәсе булып танылды һәм Гран-прига лаек булды. Уфа шәһәренең 28нче, 19нчы балалар китапханәләре, Стәрлетамак шәһәренең Үзәк балалар китапханәсе, шулай ук, җиңүче дипломын алды.
“Иске китапларның яңа тарихы” әдәби бәйгесендә 38нче Модельле балалар китап­ханәсеннән Эрика Дусеева, 47нче китапханәдән Адель Имангулова, Белорет Үзәк китапханәсеннән Азалия Шәгалина бүләкләнде. Әлшәй районыннан Игорь Грачев, Агыйдел шәһәреннән Алина Низамова, Уфаның 48нче балалар китап­ханәсеннән Ангелина Нә­биуллина, 38нче модельле китапханәдән Ростислав Вязников бәйгенең лауреатлары булды.
“Әдәби остаханә” номи­нациясендә Ш. Ходайбирдин исемендәге Үзәк шәһәр балалар китапха­нәсеннән Евгения Бабинага, “Җиңү көне белән” номи­нациясендә Уфа­ның 44нче балалар китап­ханәсеннән Ксения Райковага тиңнәр булмады.
Уфа “Нур” театрында узган бәйрәмгә Башкорт­станның халык язучысы Марат Кә­римов, балалар хикәяләре остасы Фәрзәнә Гобәйдулина, шагыйрә Әлфия Әсәдуллина, язучы Николай Грахов һәм башка танылган каләм осталары чакырылган иде. Алар нәни дусларына автографлар бирде, китапны, әдәбиятны яратырга өндәде.