+14 °С
Ачык
Гәзиткә язылуVKOKTelegramЯRus
Барлык яңалыклар
Мәгариф
30 Май 2015, 23:42

Безгә – терәк, укучыларга үрнәк ул

Уфа шәһәре 84нче татар гимназиясенең математика укытучысы Фатыйма Имаева һөнәренә 30 елдан артык тугры.Һәрвакыт ачык йөзле, якты күңелле гүзәл затның утыз елдан артык хезмәт стажы барлыгына ышанырлык та түгел. Аның һаман да көч-кодрәте, энергиясе ташып тора. Аскын кызы Фатыйма Имаеваның күңеленә бу һөнәргә сөю тойгысы башлангыч сыйныфларда белем алганда ук салына. Хыялына тугры калып, кыз урта мәктәптән соң Бөре дәүләт педагогия институтына укырга керә. Аны уңышлы тәмамлагач, районда эшли, соңрак Уфага күчә. Бүген Фатыйма Фазылбәк кызы – 84нче татар гимназиясенең югары категорияле математика укытучысы.

Иҗади эшләүче педагог предметны һәм аны өйрәтү алымнарын, балаларның психологиясен яхшы белүе белән ихтирам казана. Укытучының дәресләре төгәллеге, гыйльми-гамәли дәрәҗә­се, күргәзмә мәгълүматка бай булуы белән аерылып тора. Фатыйма Фазылбәк кызы, белем бирү һәм тәрбия өлкәсендә электән килгән алымнарны файдаланудан тыш, балалар күңеленә заманча “ачкычларны” да ярата белә.
— Дәрестә чебен очкан тавыш та ишетелү — яхшы дәрес билгесе түгел, — ди коллегам, фикерләре белән уртаклашып. — Бала дәрестә шым гына утырмаса, киресенчә, актив булса, фикерләре белән уртаклашса яхшырак. Шул чакта укучының теманы аңлаганын, аны нинди мәсьә­ләләр борчыганын ачык белергә мөмкин.
Фатыйма Фазылбәк кызының укучылары төрле дәрәҗәдәге олимпиадаларда даими уңышка ирешә, гыйльми-гамәли конференция­ләрдә алдынгы урыннар яулый. Уфа шәһәре Октябрь районының математика укытучыла­рының методик берләшмә җитәкчесе буларак, Фатыйма Имаева яшь педагогларга һәрьяклап ярдәм күрсәтә, сыйныфтан тыш чаралар, “осталык дәресләре” үткәрә. Олимпиада, имтихан эшләрен тикшерү комис­сияләренең дә әгъзасы ул.
Фатыйма Фазылбәк кызы — мәктәптә иң яхшы сыйныф җитәкчеләренең берсе. Яшь буынны берләштерүгә, сәләтләрен үстерүгә ул күп көч сала. Укучылары мәктәп тәмамлагач та остазлары янына килеп йөрүе, хәл белүе, киңәшләр соравы шул хакта сөйли. Без, бердәм коллектив, арабызда шундый педагог эшләвенә чиксез шатбыз.

Мәвзилә ҮТӘЕВА,
84нче татар гимназиясенең башкорт теле һәм әдәбияты укытучысы.
Читайте нас в