-18 °С
Болытлы
Гәзиткә язылуVKOKTelegramЯRus
Барлык яңалыклар
Мәгариф
27 август 2015, 21:04

Студентларны көз саныйлар

Бу җәһәттән республика югары уку йортларының татар бүлекләрендә хәл ничек тора?Русиядәге бүгенге кайбер күрсәт­кечләрне СССР чоры белән чагыштыру гадәте бар. Сәнәгать җитештерүендә күрсәткечләр бүген безнең файдага булмаса да, мәгарифтә уңышлар бар икән.

СССР чорында мәсәлән, татар теле һәм әдәбияты буенча белгечләрне республикабыздагы бер генә югары уку йорты — Башкортстан дәүләт уни­вер­си­тетында гына әзерлиләр иде. Без укыган сиксәненче елларда көндезге бүлеккә – 25, читтән торып уку бүлегенә 25 студент кабул ителә иде. Әле исә бу белгечлек буенча өч урында белем алалар. Алар: Башкортстан дәүләт университеты, аның Стәрлетамак филиалы һәм Мифтахетдин Акмулла исе­мендәге Баш­кортстан дәүләт педагогия университеты. Берничә ел элек Бөре дәүләт педагогия институтында да татар бүлеге бар иде. Абитуриентлар җыя алмау сәбәпле, ул ябылды. Шулай булуга карамастан, калганнарында СССР чорындагыга караганда күбрәк белгечләр әзерләнә. Элек һәр яңа уку елы саен көндезге һәм читтән торып уку бүлеге барлыгы 50 студент белән тулыланса, быел аларның саны магистрлыкка кабул ителүчеләр белән 76га җиткән. Без агымдагы елда кабул итүдәге яңалыклар турында кафедра мөдир­ләренең фикерләрен белештек. Башкортстан дәүләт универ­ситетының татар филологиясе һәм мәдәнияте кафедрасы мөдире, филология фәннәре докторы, профессор Алмаз Шәйхулов:
“Кабул итүдә саннар узган елдагыча калды. Көндезге бүлеккә — 10, читтән торып уку бүлегенә 11 студент кабул иттек. Конкурска килгәндә, көндезге бүлеккә бер урынга — ике, читтән торып уку бүлегенә 1,5 кеше дәгъва итте. Араларында олим­пиадаларда җиңүчеләр, мәктәпне алтын медальгә тәмам­лаучылар да бар. Магистратура бездә быел гына ачылды. Аңа алты кеше кабул иттек”, — диде.
Башкортстан дәүләт педагогия университетының татар кафедрасы мөдире, филология фәннәре докторы, профессор Илшат Насыйпов исә түбәндәгеләрне җиткерде:
“Узган елны көндезге бүлеккә 15 студент кабул иткән идек. Илдә барган гуманитар фәннәрне кыс­карту җилләре безгә дә кагылды, быел көндезге бүлеккә 10 кеше генә алдык. Бу бюджет исәбенә укучылар, шуңа өстәп өч контрактчы, ягъни түләп укучы студент кабул иттек. Аларның берсе Төркиядән килеп укучы. Читтән торып уку бүлегенә узган елдагы кебек 10 студент кабул ителде. Ләкин бу соңгы сан түгел, чөнки контракт буенча кабул итү 15 сентябрьгә кадәр дәвам итә. Шулай ук магистратурага да кабул итүләр булды. Көндезге бүлеккә һәм читтән торып уку бүлекләренә алтышар кеше кабул иттек. Алар арасында Казахстан яшьләре дә бар.
Конкурска килгәндә, көн­дезге бүлеккә бер урынга – 3, читтән торып уку бүлегенә 1,2 кеше дәгъва итте. Көн­дезге бүлеккә кабул ите­лүчеләр арасында өч кеше кызыл дипломлы, шулай ук татар теле һәм әдәбияты олимпиадаларында, Мифтахетдин Акмулла исемендәге олимпиадада җиңүчеләр дә бар. Ягъни араларында югары әзерлекле укучылар ярыйсы. Узган елларда читтән торып уку бүлегенә педагогия колледжларыннан соң түләүле төркемгә генә кабул итсәк, быел бушлай укыячаклар”.
Читайте нас в