Киләчәк мәгарифе нинди булыр?

Форум Конгресс-холлда тан­таналы рәвештә ачылды. Анда укыту учреждениеләренең мәгъ­лүмати стендлары һәм күргәз­мәләре урнаштырылган иде. Чарада рес­публика җитәк­чесе Рөстәм Хәмитов кат­нашты һәм күр­гәзмәләр белән танышты, “Яшь профессионаллар” конкурсында җиңгән сә­ләтле яшь­ләрне дип­ломнар белән бүләкләде.

— Күрәсез, биредә эшлекле мохит хөкем сөрә. Күргәннәр буенча фикер алышулар бара. Танышу өчен кызыклы мәгълүмат күп, барлык укыту учреждение­ләренең стендлары урнаштырылган. Бу исә яңа форматта аралаша башлау хакында сөйли. Боларны киләчәк мәгарифе дип атасак та, ул — бүгенге мәгариф. Мәгариф аша җәмгыятебез яңа компетенцияләргә ирешергә, үсәргә, прогресска барырга тиеш, — диде Рөстәм Зәки улы.

Күп халыкны берләштергән чарада, чынлап та, җанлы аралашу барды. Әйтик, Әлшәй районы мәгариф бүлеге җитәк­чесе Айдар Солтангулов укытуда заманча алымнар куллану тәҗрибәсе белән уртаклашты.

— Бу юнәлештә эзмә-эзлекле эшлибез, — диде Айдар Тимерхан улы. — Бүгенге фо­румның республика дәрәҗә­сендә үткәрелүе бу эшнең актуаль булуы турында сөйли. Без кичә Мәгарифне үстерү институтында күчмә киңәш­мә­дә Әлшәй районы тәҗ­ри­бәсе белән уртаклаштык. Электрон белем бирү тәҗри­бәсен күрсәттек, бер мәктә­бебез республика җитәкчелеге каршында презентация ясады, алдынгы укытучыбыз Оксана Быкова үзенең эш тәҗрибәсе белән бүлеште. Компьютерлаштыру бара, яңа программалар, дистанцион белем һәм интерактив белем бирү һәм башкалар оештырыла.

Стәрлебаш районы мәга­риф бүлеге начальнигы Миңнеәхмәт Кәримов үзләрендә укыту процессын оештыру үзен­чәлек­ләре белән таныштырды:

— Әлбәттә, бездә дә мәгариф өлкәсендә күп эшләр башкарыла. Укыту сыйфаты­ның үсеше һәрбер учрежде­ние­нең нәтиҗәле эшләвенә бәйле. Районда һәрбер учреж­дениегә аерым таләпләр куелган, критерийлар билгеләнгән. Укыту процессында катнашучылар үзләренә кагылышлы таләпләрне яхшы белә. Укучыларыбызга “дүртле”, “бишле” билгеләре куюны түгел, ә төпле белем бирүне максат итеп эшлибез.

Күргәзмәләрдән тыш, Конгресс-холлда Бердәм дәүләт имтиханы һәм төп дәүләт имтиханы буенча консульта­ция­ләр, дискуссион мәйданчыклар эшләде, осталык дәресләре үткәрелде. Чара кысаларында республика уку йортларында Ачык ишекләр көннәре, Сибай, Туймазы, Октябрьский, Нефтекама, Күмертау, Учалы, Белорет шәһәрләрендә һәм Мәсәгуть авылында зона форумнары уза.



* * *
Рөстәм Хәмитов электрон мәгариф үсеше буенча Башкортстан Башлыгы каршындагы Совет әгъзалары белән Мәгарифне үстерү институтында утырыш үткәрде.

Утырыш кысаларында электрон мәгариф система­сының, “Мәктәп укучыларын физика буенча дистанцион укытуның виртуаль лабораториясе” электрон мәгариф проектының презентацияләре, укытучының һөнәри үсешендә педагогик университет мөмкин­лекләре, педагогның һөнәри эшчәнлеге процессының фән­ни-методик системасы күрсә­телде.

– Электрон мәгариф тор­мышның бөтен якларының үсеш ноктасы булырга тиеш. Әлегә бу мәсьәләләр икътисад һәм социаль мохитнең өстен­лекле юнәлешләреннән аерым карала. Бу хәлне без үзгәртер­гә тиеш, – диде республика Башлыгы һәм мисалга башка дәүләтләрне, аерым алганда Көньяк Кореяне китерде. – 60 ел элек бернинди табышы булмаган, хәрабә­ләр­дә яткан, халкы ачлык кичергән ил бүген иң алдынгы дәүләт­ләрнең берсе. Бу уңышка алар бары тик дөрес мәгариф системасы аша иреште.

Нәтиҗә һәм казанышлар да билгеләнде. Электрон укыту кулланган мәктәпләр 2014 елда 12 процент булса, үткән ел бу күрсәткеч 30 процентка җиткән. 13 процент мәк­тәп­ләр электрон мәгариф үсеше буенча инновацион эшчәнлек алып бара. 70 проценттан артык укытучы мәгълүмати-коммуникацион технологияләр куллана. 24 районда электрон укытуга һәм дистанцион технологияләргә тәгаенләнгән үзәкләр ачылган. Кәгазьдә хәлләр начар булмаса да, тормышта күп сорау-ларның ачык калуын билге­ләде Рөстәм Зәки улы.

– 2020 елга без укытучы­ларыбызның квалификациясен күтәрүнең өзлексез даими системасын булдырырга тиешбез, – диде Рөстәм Хәмитов. – Бу мәсьәләне иртәрәк хәл итсәк, тагын да яхшырак. Әлегә укытучы өч елга бер белемен камилләштерә, якын арада без аны елына бер итәргә тиешбез.

Хөкүмәт Премьер-министры урынбасары Дмитрий Шаронов электрон мәгариф концепциясе булдырылуын әйтте, бу юнәлештә тә ми­нистрлык­ларның эшчән­леген берләш­терергә кирәклеген билгеләде.

– Иң мөһиме – нәтиҗә, – диде Дмитрий Владимирович. – Кеше электрон рәвештә бер яки ун сәгать укырга мөмкин, аның белемен имтихан күрсә­тәчәк. Шуңа түләү дә уку процессы өчен түгел, ә сертификат алу өчен булса яхшырак. Беле­мең бар икән, имтиханны бирә аласың.

Мәгариф министры Гөлназ Шәфыйкова электрон укыту­ның мәга­риф системасына актив кереп баруын әйтте һәм моның укы­туның бөтен баскычларында да кирәклегенә тукталды. Быел электрон мәга­риф буенча модельләр эшләү һәм тормышка ашыру өчен сигез төп грант булдырылачагы хакында сөйләде.