-29 °С
Болытлы
Гәзиткә язылуVKOKTelegramЯRus
Барлык яңалыклар
Мәгариф
1 сентябрь 2016, 02:00

Дәреслекләр әзер, ә укытучыларга һаман кытлык

Мәгариф тармагында тагын нинди мәсьәләләр көнүзәк булып кала?Мәктәп еллары һәр кеше тормышында гомернең иң гүзәл, онытылмас мизгеле булып урын ала. Быелгы җәйнең кайнар кояшында тәннәре шоколад төсенә кергән кызлар һәм малайлар бүген парта артына кереп утырачак, укытучылары, сыйныфташлары белән очрашачак. Җәйге озын ялдан соң аларны шактый авыр хезмәт — белем туплау көтә.

Быелгы уку елында республикадагы 1362 мәктәптә 450 мең укучы белем алачак. Шунысы сөенечле: укучы өчен иң мөһим булган дәреслекләр турында алдан кайгыртылган. Яңа уку елында барлык мәктәп укучылары да кирәкле дәреслекләр, уку кулланмасы белән тәэмин ителәчәк. Бу турыда Русия Президентының Идел буе федераль округын­дагы Тулы вәкаләтле вәкиле ярдәмчесе Олег Машковцев үткәргән видеоконференция барышында республика мә­гариф министры Гөлназ Шәфыйкова хәбәр итте. Министр белдерүенчә, быел дәреслекләр, уку әсбаплары, уеннар, уенчыклар алу өчен республика бюджетыннан 443 миллион 267,6 мең сум бүленгән, аның 431 миллион 414,1 меңе — район һәм шәһәрләргә, 11 миллион 853,5 мең сумы дәүләт мәгариф оешмаларына юнәлтелгән.

Гөлназ Радмил кызы быелгы уку елында кайбер мәктәпләрдә белгечләр җит­мәвен дә билгеләп үтте. Әлеге вакытта республикада 38 845 педагог укучыларга белем бирергә әзерләнсә, 268 урынга белгеч таләп ителә. Бүген мәктәпләргә математика, чит телләр, башлангыч сыйныф укытучылары, тәрбия­челәр, өстәмә белем бирү педагог­лары җитми.

Видеоконференция бары­шында яңа уку елында Идел буе федераль округы төбәк­ләрендәге мәктәпләрнең барысының да тиешле лицензиясе булуы, округның 7 субъектында 10 яңа мәктәп ачылуы турында да билгеләп үтелде.
Республикада мәктәп­ләрнең уку елына әзерлеге турында Русия Президентының Башкортстандагы кабул итү бүлмәсендә оештырылган “кайнар элемтә” вакытында мәгариф министры урынбасары Филүз Минәҗев җавап бирде. “Мәктәпләрнең уку елына әзерлеген тикшергәндә 4 мәктәптә җитешсезлекләр ачыкланган иде, бүген алар укучыларны кабул итәргә әзер. Бүздәк районының Кәпәй-Кобау мәктәбендә әлегә реконструкция бара. Андагы укучыларга ике автобус бирелде, ремонт тәмамланганчы балалар якындагы мәктәптә укыячак”, — диде Филүз Хәмитҗан улы.

“Кайнар элемтәгә”гә Уфа, Салават шәһәрләреннән, Чишмә, Бакалы, Ишембай районнарыннан ата-аналар үзләрен борчыган сораулар белән мөрәҗәгать итте. Шалтыратучыларны транспорт, мәктәптә туклану, ике сменада укыту, укучыларның белемен тикшерү буенча кертелгән яңалыклар һәм башка мәсьәләләр борчый.

Мәсәлән, Бакалы районыннан шалтыратучы автобусларның техник хәленә зарланды, Килкабыз-Катай юлларының начарлыгына, укучылар өчен уңайсыз гына түгел, көзге пычракта хәвеф тудыруына борчыла. Филүз Хәмит­җан улы әйтүенчә, быел районнар­га 76 яңа мәктәп автобусы бирел­гән. Федераль программа буенча 15 сен­тябрь­­гә кадәр республика 58 мәктәп автобусы алырга тиеш. Яңа автобуслар файдалану вакыты чыккан, яки укучыларны йөртү хәвеф­сезлеге таләпләренә туры килмәгән транспортны алыштырачак.

Мәгариф министры урынбасары аңлатуынча, 2025 елга кадәр мәктәпләрне тулысынча бер сменалы укытуга күчерү планлаштырыла. Моның өчен 10 ел эчендә 70 мең яңа уку урыны булдырырга кирәк. Мәктәпләргә капиталь ремонт ясау һәм яңаларын төзү өчен республика 2 миллиард сумнан артык акча бүлә. Федераль бюджеттан кергән өстәмә акчалар да шул максатта тотылачак.

“Чишмәдәге 5нче мәктәпне кайчан ачалар? дип сорый андагы ата-аналар исеменнән шалтыратучы. — Ике ел элек капиталь ремонтка япканнар иде, бу уку елына да бернәрсә дә эшләнмәде. Ата-аналар да, укучылар да түзем­сезләнеп көтә”.

Баласы Уфаның 49нчы мәктә­бендә белем алучы әни башлангыч сыйныфларда һәр ярты ел саен укытучы алышынып торуына борчыла, бу хәлгә җаваплы кешеләр­нең игътибар итүен сорый.

Бакалы районының Иске Гусево авылында яшәүче башлангыч мәктәпнең буш торуы хакында хәбәр итте. “16 укучыбыз бар, теләгебез: бер түбә астына мәктәп­не, балалар бакчасын бер­ләштерү”, — ди ул.

Шулай ук, “кайнар линия”гә шалтыратучы ата-аналар бик күпләрне борчыган акча мәсьә­лә­сен дә күтәрмичә калмады. Ишем­байдан шалтыратучы, мәктәптәге ремонт өчен ата-аналардан акча җыялар, ел саен 4-5 мең сум акча бирергә туры килә, дип зарланды.

Мәгариф министрлыгы белгеч­ләре, һәр шалтыратучыны игътибар белән тыңлап, сорауларның җавапсыз калмаячагына ышандырды.

Әлбәттә, бүген укыту системасына кагылышлы сораулар бик күп, аларның кайберләренә төгәл җавап та юктыр, бәлки. Шулай да әти-әниләрнең мәктәп, балалар тормышына битараф булмавы сөендерә. Укытучыларның, югары сыйныф укучыларының Мәгариф министрлыгы белгечләренә сораулары булмавын яңа уку елына әзерләнү мәшәкатьләре белән аңлатырга буладыр. Ә без, үз чиратыбызда, укытучыларны һәм укучыларны яңа уку елы башлану — Белем көне белән котлап, аларга уңышлар, белем баскычларыннан тагын да югарырак күтәре­лүләрен телик.
Читайте нас в